ស្ថិតនៅតំបន់ឆ្នេរទីក្រុងហ្កាហ្សា ប្រជានេសាទប៉ាឡេស្ទីន បានជួបជុំគ្នាដោយសង្ឃឹមថានឹងចាប់បានត្រីគ្រប់គ្រាន់សម្រាប់ចិញ្ចឹមគ្រួសាររបស់ពួកគេ ។

ប៉ុន្តែរយៈពេល ១៥ខែនៃសង្រ្គាមរវាងអ៊ីស្រាអែល និងក្រុមហាម៉ាស់ បានធ្វើឧស្សាហកម្មនេសាទនៅក្នុងទីក្រុងមួយនេះ ក្លាយជាកម្ទេចកម្ទីរ ។ ភាគច្រើននៃអ្នកនេសាទ បានបាត់បង់ទូករបស់ពួកគេ ។

លោក Jamal Al-Amoudi គឺជាអ្នកនេសាទមួយរូប និយាយថា ប្រាក់របស់ពួកយើងអស់រលីងពីខ្លួនហើយ ទូករបស់ពួកយើងក៏ត្រូវបានបំផ្លិចបំផ្លាញ ហើយអ្វីដែលពួកយើងមើលឃើញនៅពេលនេះ វាគ្រាន់តែជាចម្រឹងដែកប៉ុណ្ណោះ ។

លោកបន្តថា លោកធ្លាប់មានទូកធំបណ្តោយប្រវែង ១៧ម៉ែត្រ និងមានទូកតូចៗចំនួន ១០គ្រឿង ប៉ុន្តែឥឡូវលោកគ្មានសេសសល់ទូកមួយគ្រឿងណាឡើយ វាត្រូវបានបំផ្លិចបំផ្លាញអស់រលីងហើយ ។ មិនមែនតែលោកម្នាក់ប៉ុណ្ណោះទេ ប៉ុន្តែគឺមនុស្សទាំងអស់រស់នៅទីនេះ ។

សូមបញ្ជាក់ថា មុនសង្រ្គាមផ្ទុះឡើង ការនេសាទត្រី គឺជាផ្នែកមួយដ៏សំខាន់នៅក្នុងជីវិតរស់នៅប្រចាំថ្ងៃក្នុងតំបន់ហ្កាហ្សាស្រ្ទីប ។

ក្រុមប្រជានេសាទចេញទៅរកត្រី និងវិលត្រឡប់មកវិញជាមួយត្រីស្រស់ៗ ដើម្បីលក់ក្នុងទីផ្សារក្នុងស្រុក ។ ឧស្សាហកម្មមួយនេះ ផ្តល់ជាប្រភពប្រាក់ចំណូលដ៏សំខាន់មួយដល់គ្រួសារជាច្រើន ហើយក៏ជាផ្នែកមួយនៃជីវិតរស់នៅក្នុងសហគមន៍ដែរ ។

ប៉ុន្តែអំឡុងសង្រ្គាម ការរឹតត្បិតរបស់អ៊ីស្រាអែលនៅក្នុងដែនសមុទ្រជិតដែនដីឡោមព័ទ្ធមួយនេះ បានរារាំងក្រុមប្រជានេសាទពីការចេញទៅរកត្រីនៅក្នុងសមុទ្រ ៕