ប្រភពព័ត៌មានចំនួន២ បាននិយាយប្រាប់ទីភ្នាក់ងារព័ត៌មានរ៉យទ័រថា រោងចក្រចម្រាញ់ប្រេង Syzran ប្រតិបត្តិការដោយក្រុមហ៊ុនប្រេងខ្នាតយក្ស Rosneft របស់រុស្ស៊ី បានផ្អាកដំណើរការផលិតប្រេងរបស់ខ្លួនកាលពីថ្ងៃពុធ ដោយសារអគ្គិភ័យឆាបឆេះ បន្ទាប់ពីការវាយប្រហាររបស់យានដ្រូនអ៊ុយក្រែន ។

នៅក្នុងវីដេអូដែលបានបង្ហោះនៅលើបណ្តាញព័ត៌មានសង្គមឃើញផ្សែងខ្មៅហុយពីលើរោងចក្រចម្រាញ់ប្រេង ។ ទីភ្នាក់ងារព័ត៌មានរ៉យទ័រអាចបញ្ជាក់បានទីតាំងនៅក្នុងវីដេអូ ដោយផ្គូរផ្គងជាមួយបំពង់ផ្សែង ប្លង់ផ្លូវ និងអគារជុំវិញ ។

អភិបាលតំបន់ Samara ជាទីដែលរោងចក្រចម្រាញ់ប្រេង Syzran ស្ថិតនៅ បាននិយាយថា រោងចក្រមួយនេះ រងការវាយប្រហារដោយយានដ្រូនរបស់អ៊ុយក្រែនកាលពីយប់កន្លងទៅ ។

ប្រភពព័ត៌មានឧស្សាហកម្មនិយាយថា រោងចក្រចម្រាញ់ប្រេង Syzran ដែលមានសមត្ថភាពចម្រាញ់ប្រេង ១៥ម៉ឺនបារ៉ែលក្នុង ១ថ្ងៃ បានផ្អាកបណ្តោះអាសន្នដោយសារអគ្គិភ័យឆាបឆេះ ៕