ជនប៉ាឡេស្ទីន បានជួបជុំគ្នានៅទីក្រុង Khan Younis ដើម្បីមើលពិធីប្រគល់សាកសពចំណាប់ថ្នូរអ៊ីស្រាអែល ៤នាក់ នៅថ្ងៃព្រហស្បតិ៍នេះ ។

នៅក្នុងចំណោមពួកគេគឺអ្នកស្រី Rasmia Abu Shahla ដែលបានអំពាវនាវឲ្យសង្រ្គាមបញ្ចប់ និងអំពាវនាវឲ្យប្រធានាធិបតីសហរដ្ឋអាមេរិកលោក Donald Trump បញ្ចប់ជម្លោះមួយនេះ ។

គួរឲ្យដឹងថា នៅថ្ងៃព្រហស្បតិ៍នេះ ក្រុមហាម៉ាស់ បានប្រគល់សាកសពចំណាប់ថ្នូរអ៊ីស្រាអែល ៤នាក់ ដល់គណៈកម្មាធិការកាកបាទក្រហមអន្តរជាតិ(ICRC)នៅទីក្រុង Khan Younis ស្ថិតក្នុងតំបន់ហ្កាហ្សាស្រ្ទីប ។

 អ្នកតំណាង ICRC បានចុះហត្ថលេខាលើឯកសារជាមួយយុទ្ធជនហាម៉ាស់បិទមុខម្នាក់នៅលើវេទិកាដែលត្រូវបានរៀបចំឡើងសម្រាប់ការប្រគល់សាកសព ។

ក្រុមហាម៉ាស់ បានប្រគល់សាកសពទារក Kfir Bibas បងប្រុស Ariel អាយុ ៤ឆ្នាំ ជាមួយម្តាយ Shiri Bibas របស់ពួកគេ និងសាកសពចំណាប់ថ្នូរទី ៤ លោក Oded Lifschitz ក្រោមកិច្ចព្រមព្រៀងបទឈប់បាញ់ដែលបានឈានដល់កាលពីខែមុន ដោយមានការគាំទ្រពីអង្គការសហប្រជាជាតិ(UN) និងការសម្របសម្រួលពីកាតា និងអេហ្ស៊ីប ។

បដាដ៏ធំមួយត្រូវបានព្យួរនៅលើវេទិការប្រគល់សាកសពចំណាប់ថ្នូរ ដោយមានរូបលោក Netanyahu ជាបិសាចជញ្ជក់ឈាម ឈរលើរូបភាពចំណាប់ថ្នូរទាំង ៤នាក់ ៕