ភ្នំពេញ៖ ការរឹបអូស និងដាក់លក់ទ្រព្យសម្បត្តិរបស់ពិរុទ្ធជន ឬកូនបំណុល តាមផ្លូវតុលាការជានីតិវិធីអនុវត្តជាប្រក្រតី លើគ្រប់បុគ្គលដែលមានកាតព្វកិច្ចសងសំណងរដ្ឋប្បវេណី មិនមែនអនុវត្តចំពោះតែ សម រង្ស៊ី និង ជូឡុង-សូមួរ៉ា ទេ។ នេះជាសេចក្តីថ្លែងការណ៍ដែលបានចេញផ្សាយនៅថ្ងៃទី១៧ ខែវិច្ឆិកា ឆ្នាំ២០២១ ដោយ ក្រុមមេធាវីរាជរដ្ឋាភិបាលដែលមានឯកឧត្តមគីតិចជាប្រធាន។

សេចក្តីថ្លែងការណ៍ដដែរបានញ្ជាក់ថា ជនដែលប្រព្រឹត្តល្មើសច្បាប់ ត្រូវទទួលទោស និងទណ្ឌកម្ម តាមការកំណត់នៃច្បាប់។

ការអនុវត្តទោសទណ្ឌ តាមសេចក្តីសម្រេចរបស់តុលាការ ដែលបានឆ្លងកាត់ដំណើរការនីតិវិធីតាមផ្លូវច្បាប់ និងក្លាយជា សេចក្តីសម្រេចស្ថាពររួចហើយនោះ ជានិយាមអនុវត្តទូទៅ និងជាប្រក្រតី នៅគ្រប់បណ្តាប្រទេសដែលប្រកាន់យកនីតិរដ្ឋ។

នៅពេលដែលបុគ្គលណាម្នាក់ ប្រព្រឹត្តអំពើដែលជាបទល្មើសព្រហ្មទណ្ឌ ច្បាប់ព្រហ្មទណ្ឌកម្ពុជាកំណត់ចែងនូវទោសដាក់ពន្ធនាគារ និងទោសពិន័យជាប្រាក់ជាអាទិ៍ ដែលជាលទ្ធផលនៃបណ្តឹងអាជ្ញា និងទណ្ឌកម្មសំណងផ្នែក រដ្ឋប្បវេណី ដែលជាលទ្ធផលនៃបណ្តឹងរដ្ឋប្បវេណី ដើម្បីជួសជុលការខូចខាតរបស់ជនរងគ្រោះដែលបណ្តាលមកពីអំពើល្មើសនោះ។

ក្នុងនោះដែរ ប្រសិនបើពិរុទ្ធជន មិនអនុវត្តសងសំណងជួសជុលការខូចខាតដល់ដើមបណ្តឹង ដោយស្ម័គ្រចិត្តទេ ដើមបណ្តឹង មានសិទ្ធិសុំឱ្យតុលាការ រឹបអូសទ្រព្យសម្បត្តិរបស់ពិរុទ្ធជនយកទៅលក់ឡៃឡុង ដើម្បីយកប្រាក់មកសងសំណងទៅតាមការកំណត់នៃសាលក្រម ឬសាលដីកា ដែលបានចូលជាស្ថាពរ ឬដែលមាន អានុភាពអនុវត្តដោយបង្ខំ បើទោះបីជាពិរុទ្ធជនបានគេចខ្លួន មិនទាន់អាចឱ្យអាជ្ញាធរមានសមត្ថកិច្ច អនុវត្តទោសព្រហ្មទណ្ឌលើបុគ្គលនោះក្តី។

នៅក្នុងសេចក្តីថ្លែងការបានសង្កត់ធ្ងន់ថា បុគ្គលឈ្មោះ សម រង្ស៊ី និង ជូឡុង-សូមួរ៉ា បានប្រព្រឹត្តអំពើដែលច្បាប់ព្រហ្មទណ្ឌកម្ពុជាបញ្ញត្តិថាជាបទល្មើស។ នីតិវិធីរបស់តុលាការ បានប្រព្រឹត្តទៅតាមលំដាប់លំដោយ រហូតចប់សព្វគ្រប់តាមច្បាប់ជាធរមាន ហើយបុគ្គលនេះ ត្រូវបានតុលាការរកឃើញមានពិរុទ្ធភាពចំពោះការប្រព្រឹត្តអំពើល្មើសនឹងច្បាប់ព្រហ្មទណ្ឌ តាមរយៈសេចក្តីសម្រេច របស់តុលាការ ដែលបានក្លាយជាស្ថាពរ បិទផ្លូវតវ៉ា និងមានអានុភាពអនុវត្ត ដែលជាលទ្ធផលបានកំណត់ផ្តន្ទាទោសជនល្មើសនេះពីបទព្រហ្មទណ្ឌ និងកំណត់ផ្តល់សំណងរដ្ឋប្បវេណី ជូនដើមបណ្តឹងជាជនរងគ្រោះ។ បច្ចុប្បន្នបុគ្គលបំពានច្បាប់ឈ្មោះ សម រង្ស៊ី និង ជូឡុង-សូមួរ៉ា ត្រូវប្រឈមនឹងអំណាចសាលក្រម សាលដីកា ដែលចូលជាស្ថាពរជាបន្តបន្ទាប់ទៀត ព្រមទាំងបណ្តឹងសុំអនុវត្តដោយបង្ខំជាបន្តបន្ទាប់ទៀតផងដែរ។

ឯកឧត្តម គី តិច បានបញ្ជាក់បន្ថែមថា នីតិវិធីអនុវត្តតាមរយៈការចេញដីកាសម្រេចចាប់ផ្តើមការលក់ដោយបង្ខំ នូវអចលនវត្ថុដែលជាកម្មសិទ្ធិរបស់ ពិរុទ្ធជនឈ្មោះ សម រង្ស៊ី និង ជូឡុង-សូមួរ៉ា ដែលជាទ្រព្យឯកជនរបស់ពិរុទ្ធជននេះ ជាការប្រតិបត្តិនូវ ច្បាប់ និងនីតិវិធីជាធរមានទាំងស្រុង។

ថ្វីត្បិតតែអចលនវត្ថុនេះ ធ្លាប់ត្រូវបានប្រើប្រាស់ជាទីស្នាក់ការនៃអតីត គណបក្សនយោបាយ ប៉ុន្តែ ទ្រព្យនេះជាកម្មសិទ្ធិរបស់រូបវ័ន្តបុគ្គលឈ្មោះ សម រង្ស៊ី និង ជូឡុង-សូមួរ៉ា ដែលមានកាតព្វកិច្ចត្រូវសងសំណងរដ្ឋប្បវេណី តាមអំណាចនៃសេចក្តីសម្រេចស្ថាពររបស់តុលាការ ហើយមិនបានសងសំណងនោះដោយស្ម័គ្រចិត្ត។

នៅពេលដែលនីតិវិធីលក់ដោយបង្ខំត្រូវបានអនុវត្តចប់រួចរាល់លើអចលនវត្ថុនេះ អចលនវត្ថុនេះនឹងក្លាយជាកម្មសិទ្ធិរបស់ អ្នកទិញ ដែលបានដេញថ្លៃទិញពីតុលាការ ហើយបុគ្គល សម រង្ស៊ី និង ជូឡុង-សូមួរ៉ា ឬជនណាក៏ដោយ គ្មានសិទ្ធិ ទទួលបានអចលនវត្ថុនេះវិញឡើយ។

សូមរបញ្ជាក់ថា សាលាដំបូង រាជធានី ភ្នំពេញ បានចេញ ដីកា សម្រេច លក់ ដោយ បង្ខំ ផ្ទះ ទណ្ឌិត សម រង្ស៊ី ដែលជាអតីតទីស្នាក់ការ អតីត គណបក្ស សង្គ្រោះជាតិ ដើម្បី យកលុយ ទៅ សង ម្ចាស់បំណុល ចំនួន ៤ ភាគី ។ យោងតាម ដីកា ចំនួន ៤ ដែល ចេញ ដាច់ឡែក ពីគ្នា ដោយ លោក អ៊ឹម វណ្ណៈ ចៅក្រម អនុវត្ត សាលាដំបូង រាជធានី-ភ្នំពេញ កាលពីថ្ងៃទី៤ ខែវិច្ឆិកា ឱ្យដឹងថា ផ្ទះដែលលក់ទាំង បង្ខំ នេះ នឹងត្រូវ បង់ ជិត ១ លាន ដុល្លារ ជូន សម្តេចតេជោ នាយករដ្ឋមន្ត្រី ហ៊ុន សែន បង់ប្រាក់ ៦ សែនដុល្លារ ជូនសម្តេចពញា ហេង សំរិន បង់ប្រាក់ ប្រមាណ ៥ សែនដុល្លារ ជូន ឧបនាយករដ្ឋមន្ត្រី ស ខេង និងបង់ប្រាក់ជាង ៤,៤ សែនដុល្លារជូនរដ្ឋាភិបាលកម្ពុជា។

ដីកាសម្រេចនេះបន្តថា ផ្ទះត្រូវបាន រឹបអូស អចលនវត្ថុ ចេញ ដោយ មន្ទីរ រៀបចំ ដែនដី នគរូបនីយកម្ម សំណង់ និង សុរិយោដី រាជធានី ភ្នំពេញ ដែលមានប័ណ្ណសម្គាល់លេខ ភព ០៩ ៧២៥ ចុះ ថ្ងៃទី ១៥ ខែសីហា ឆ្នាំ ២០០៧ គឺ ស្ថិតនៅផ្ទះលេខ៥៧៦ ផ្លូវជាតិលេខ២ ភូមិព្រែក តាគង់ សង្កាត់ចាក់អង្រែលើ ខណ្ឌមានជ័យ រាជធានី ភ្នំពេញ ដែលជា កម្មសិទ្ធិ របស់ កូនបំណុល នៃ ការអនុវត្ត ឈ្មោះ សម រង្ស៊ី និង ប្រពន្ធ ឈ្មោះ ជូឡុង សូមួរ៉ា ដើម្បី យកប្រាក់ មក ទូទាត់ បំណុល ឱ្យ ម្ចាស់បំណុល នៃ ការអនុវត្ត រហូតដល់ គ្រប់ ចំនួន៕ អត្ថបទ៖ ដាវណ្ណ