ប្រជាពលរដ្ឋអ៊ុយក្រែន បានបង្ហាញការគាំទ្រដល់លោក Volodymyr Zelenskiy ស្របពេលដែលប្រធានាធិបតីសហរដ្ឋអាមេរិកលោក Donald Trump ចាត់ទុកលោកថា ជាជនផ្តាច់ការដោយគ្មានការបោះឆ្នោត ។

 គួរឲ្យដឹងថា កាលពីថ្ងៃពុធម្សិលមិញ លោក Trump បានបង្កើនសង្រ្គាមពាក្យសម្តីរបស់លោកជាមួយលោក Zelenskiy និងបរិហារមេដឹកនាំម្នាក់នេះថា ជាជនផ្តាច់ការដោយគ្មានការបោះឆ្នោត ដោយរូបលោកនិយាយនៅលើបណ្តាញព័ត៌មានសង្គម Truth Social ថា គាត់ត្រូវតែចាត់វិធានការឲ្យបានបឆាប់រហ័ស បើពុំដូច្នោះទេគាត់នឹងត្រូវបបាត់បង់ប្រទេស ។

 ការបង្ហោះសាររបស់លោក Trump បានកើតមានឡើងរយៈពេលប៉ុន្មានម៉ោងប៉ុណ្ណោះ ក្រោយលោក Zelenskiy និយាយថា ប្រធានាធិបតីសហរដ្ឋអាមេរិកជាប់ផុងក្នុងពិភពព័ត៌មានមិនពិតរបស់រុស្ស៊ី ក្រោយលោក Trump លើកឡើងថា អ៊ុយក្រែន ត្រូវទទួលខុសត្រូវចំពោះការវាយលុកពេញលេញរបស់រុស្ស៊ី ។ លោក Trump និយាយថា អ្នកមិនត្រូវចាប់ផ្តើមវានោះទេ អ្នកអាចបង្កើតកិច្ចព្រមព្រៀងមួយបាន ។

 លោក Hanna Shepyl គឺជាពលរដ្ឋមួយរូបរស់នៅក្នុងទីក្រុងគីវ និយាយប្រាប់ទីភ្នាក់ងារព័ត៌មានថា ច្បាស់ណាស់ថា លោក Zelenskiy មិនមែនជាជនផ្តាច់ការនោះទេ ។ លោកតែងតែឈរខាងប្រទេសរបស់ពួកយើង ទោះក្នុងករណីណាក៏ដោយ ។ 

លោកបន្តថា លោកបោះឆ្នោតឲ្យគាត់ផងដែរ ហើយលោកសង្ឃឹមថាលោក Trumpនឹងផ្លាស់ប្តូរការសម្រេចចិត្តរបស់គាត់ ដោយសារតែគាត់បានធ្វើសេចក្តីថ្លែងការណ៍ខុស ។

 សូមបញ្ជាក់ថា អាណត្តិរយៈពេល ៥ឆ្នាំរបស់លោក Zelenskiyជាប្រធានាធិបតីអ៊ុយក្រែន គ្រោងនឹងត្រូវបញ្ចប់កាលពីឆ្នាំ ២០២៤ ប៉ុន្តែការបោះឆ្នោតមិនអាចរៀបចំឡើងបានទេ ដោយសារច្បាប់អាជ្ញាសឹក ដែលអ៊ុយក្រែនដាក់កាលពីខែកុម្ភៈ ឆ្នាំ ២០២២ ជាការឆ្លើយតបនឹងការវាយលុករបស់រុស្ស៊ី ៕