ប្រធានទីភ្នាក់ងារចារកម្មយោធា GUR របស់ប្រទេសអ៊ុយក្រែន លោក Kyrylo Budanov ជឿជាក់ថា បទឈប់បាញ់ក្នុងសង្គ្រាមជាមួយរុស្ស៊ី អាចកើតមានឡើង នៅឆ្នាំនេះ។

នៅក្នុងបទសម្ភាសន៍តាមរយៈឆាណែល YouTube ជាមួយអ្នកសារព័ត៌មាន លោក Eynulla Fatullayev លោក Budanov បាននិយាយថា៖ «ខ្ញុំគិតថា វា (បទឈប់បាញ់) នឹងកើតឡើង។ មានកត្តារួមផ្សំជាច្រើន ដែលអាចនាំឲ្យវាកើតឡើង»។

តែយ៉ាងណាក្ដី លោកមិនបានផ្តល់ព័ត៌មានសេចក្ដីលម្អិតនោះទេ។ មន្ត្រីអ៊ុយក្រែនភាគច្រើនច្រានចោលគំនិតនៃការឈានដល់បទឈប់បាញ់ ដោយព្រមានថា វានឹងផ្តល់ពេលវេលាឲ្យរុស្ស៊ី ដើម្បីបំពាក់អាវុធឡើងវិញ និងរៀបចំ សម្រាប់ការលុកលុយបន្ថែមទៀត។ 

គួរបញ្ជាក់ថា ការពិភាក្សាអំពីលទ្ធភាពនៃការឈានដល់បទឈប់បាញ់ បានមានកាន់តែខ្លាំងឡើងៗ បន្ទាប់ពីលោក Donald Trump ដែលបានសន្យាថា នឹងបញ្ចប់សង្រ្គាមយ៉ាងឆាប់រហ័សនោះ បានវិលត្រលប់ទៅសេតវិមានវិញ សម្រាប់អាណត្តិទី២ ក្នុងនាមជាប្រធានាធិបតីរបស់អាមេរិក។

ដោយចាប់ផ្តើមឡើងតាមរយៈការជជែកតាមទូរសព្ទរបស់លោក Trump ជាមួយប្រធានាធិបតីរុស្ស៊ី លោក Vladimir Putin កាលពីមួយសប្តាហ៍មុន កិច្ចប្រឹងប្រែងការទូតដែលកំពុងដំណើរការយ៉ាងលឿនរហ័ស ស្ដីពីបញ្ហាអ៊ុយក្រែន បានបង្កជាក្ដីបារម្ភ នៅក្នុងទីក្រុងគីវ និងរដ្ឋធានីនៃបណ្ដាប្រទេសអឺរ៉ុបផ្សេងទៀត៕