យោងតាមបណ្តាញមេធាវីបានឱ្យដឹងក្នុងសប្ដាហ៍នេះថា ទាហានប៉ារ៉ាស៊ូដង់ បានសម្លាប់មនុស្សជាង ២០០នាក់ ក្នុងការវាយលុករយៈពេល ៣ថ្ងៃលើភាគខាងត្បូងនៃរដ្ឋធានីខាទុម ខណៈរដ្ឋាភិបាលដែលគាំទ្រដោយកងទ័ព បានដាក់ចំនួនអ្នកស្លាប់កើនឡើងលើសទ្វេដងនៃតួលេខនេះ។

បណ្តាញមេធាវីសង្គ្រោះបន្ទាន់ ដែលបានចងក្រងឯកសារពីការរំលោភសិទ្ធិមនុស្សក្នុងអំឡុងពេល ២២ខែនៃការប្រយុទ្ធគ្នារវាងកងកម្លាំងសន្តិសុខគូប្រជែង បាននិយាយថា មនុស្សរាប់រយនាក់ទៀតបានរងរបួស ឬបាត់ខ្លួន ហើយគេបារម្ភថាមនុស្សជាច្រើនអាចលង់ទឹកស្លាប់ បន្ទាប់ពីទាហានប៉ារ៉ាបាញ់ប្រហារអ្នកភូមិ ក្នុងពេលពួកគេព្យាយាមរត់គេចឆ្លងកាត់បណ្ដាញទន្លេនីល។

ដោយឡែក ក្រសួងការបរទេសនៃរដ្ឋាភិបាលគាំទ្រដោយកងទ័ពបាននិយាយថា មនុស្សចំនួន ៤៣៣នាក់ រួមទាំងកុមារ ត្រូវបានសម្លាប់នៅក្នុងការវាយប្រហារដោយកងកម្លាំងគាំទ្ររហ័សយោធាប៉ារ៉ា (RSF) នោះ។

អ្នកនាំពាក្យម្នាក់របស់អគ្គលេខាធិការអង្គការសហប្រជាជាតិ លោក Antonio Guterres បាននិយាយថា ស្ថាប័នពិភពលោកមួយនេះបានទទួល "របាយការណ៍ដ៏គួរឱ្យរន្ធត់ ដែលថាស្ត្រីរាប់សិបនាក់ត្រូវបានរំលោភ ហើយរាប់រយគ្រួសារត្រូវបានបង្ខំឱ្យភៀសខ្លួន" ពីជម្លោះដ៏ហិង្សានេះ៕