បេសកជនពិសេសរបស់អង្គការសហប្រជាជាតិប្រចាំប្រទេសស៊ីរី បាននិយាយកាលពីថ្ងៃព្រហស្បតិ៍ថា ការបង្កើតរដ្ឋាភិបាលចម្រុះមួយ នៅក្នុងសាធារណរដ្ឋអារ៉ាប់ស៊ីរី ក្នុងប៉ុន្មានសប្តាហ៍ខាងមុខ នឹងជួយកំណត់ថាតើទណ្ឌកម្មរបស់លោកខាងលិច ត្រូវបានដកចេញឬយ៉ាងណា នៅពេលដែលប្រទេសនេះ ត្រូវបានកសាងឡើងវិញ បន្ទាប់ពីការបណ្តេញចេញពីអតីតប្រធានាធិបតីលោក បាសា អាល់អាសាដ( Bashar al-Assad)។

លោក Geir Pedersen បាននិយាយនៅក្នុងបទសម្ភាសន៍មួយ ក្នុងអំឡុងដំណើរទស្សនកិច្ចទៅកាន់ទីក្រុងដាម៉ាសថា ៖«អ្វីដែលខ្ញុំសង្ឃឹមនោះ គឺថា ជាមួយរដ្ឋាភិបាលចម្រុះថ្មីពិតប្រាកដ នឹងត្រូវបង្កើតឡើង នៅថ្ងៃទី ០១ ខែមីនា នេះនឹងជួយយើងក្នុងការដកទណ្ឌកម្ម» ដែលបានដាក់លើប្រទេសស៊ីរី ដោយបណ្តាប្រទេសលោកខាងលិច ក្នុងអំឡុងពេលគ្រប់គ្រងរបស់លោក អាសាដ។

បន្ទាប់ពីលោក អាសាដ ត្រូវបានផ្តួលរំលំ នៅក្នុងការវាយលុករបស់ក្រុមឧទ្ទាម នៅក្នុងខែធ្នូ ក្រុមឥស្លាមនិយម Hayat Tahrir Al-Sham ឬ HTS ជាក្រុមដែលបច្ចុប្បន្ន កំពុងគ្រប់គ្រងប្រទេសស៊ីរី បានបង្កើត រដ្ឋបាលបណ្តោះអាសន្នមួយ ដែលមានសមាជិកភាគច្រើននៃ«រដ្ឋាភិបាលស្រោចស្រង់ជាតិរបស់ខ្លួន ដែលបានគ្រប់គ្រងនៅភាគពាយព្យនៃប្រទេសស៊ីរី។

នៅពេលនោះ អាជ្ញាធរពិតប្រាកដរបស់ប្រទេសនេះ បាននិយាយថា រដ្ឋាភិបាលថ្មី នឹងត្រូវបានបង្កើតឡើងតាមរយៈដំណើរការពេញលេញមួយ នៅខែមីនា។

កាលពីខែមករា អតីតមេដឹកនាំក្រុមឥស្លាមនិយម HTS លោក Ahmad Al-Sharaa ត្រូវបានតែងតាំង ជាប្រធានាធិបតីស៊ីរី បន្ទាប់ពីកិច្ចប្រជុំនៃអតីតក្រុមសកម្មប្រយុទ្ធភាគច្រើនរបស់ប្រទេសនេះ។