រដ្ឋមន្ត្រីក្រសួងមហាផ្ទៃក្នុងរបស់ប្រទេសនេះ បាននិយាយថា ប្រទេសប៊ូរុនឌី បានទទួលអ្នកស្វែងរកសិទ្ធិជ្រកកោន ចន្លោះពី ២០.000នាក់ ទៅ ៣៥.000នាក់ ពីសាធារណរដ្ឋប្រជាធិបតេយ្យកុងហ្គោ (DRC) ចាប់តាំងពីខែកុម្ភៈ ឆ្នាំ ២០២៥។ 

រដ្ឋមន្ត្រីក្រសួងមហាផ្ទៃប្រទេសប៊ូរុនឌី ការអភិវឌ្ឍន៍សហគមន៍ និងសន្តិសុខសាធារណៈ លោក Martin Niteretse បានធ្វើការអត្ថាធិប្បាយ កាលពីល្ងាចថ្ងៃពុធ បន្ទាប់ពីបានជួបជាមួយឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ដៃគូអភិវឌ្ឍន៍ និងអង្គការមនុស្សធម៌អន្តរជាតិ ដើម្បីដោះស្រាយការហូរចូលជាបន្តបន្ទាប់នៃអ្នកស្វែងរកសិទ្ធិជ្រកកោនកុងហ្គោ ដែលភៀសខ្លួនពីអសន្តិសុខ នៅក្នុងខេត្ត Kivu ភាគខាងត្បូងរបស់ប្រទេសនេះ។

«មន្រ្តីនគរបាលកុងហ្គោប្រហែល ១០០នាក់ ក៏បានឆ្លងចូលទៅក្នុងប្រទេសប៊ូរុនឌីផងដែរ កាលពីថ្ងៃពុធ ដើម្បីស្វែងរកការជ្រកកោន។ លោក Niteretse បាននិយាយថា អ្នកស្វែងរកសិទ្ធិជ្រកកោនទាំងអស់នោះ ចាំបាច់ត្រូវការពារជាបន្ទាន់» ដោយបានបន្ថែមថា ចំនួននៃអ្នកមកដល់ បានកើនឡើងខ្លាំង ជាពិសេសបន្ទាប់ពីថ្ងៃទី ១៤ ខែកុម្ភៈ។

លោកបាននិយាយថា ចាប់ពីថ្ងៃទី១៤ ដល់ថ្ងៃទី ១៦ ខែកុម្ភៈ អ្នកស្វែងរកសិទ្ធិជ្រកកោនជិត ១០.000នាក់  បានឆ្លងចូលទៅក្នុងប្រទេសប៊ូរុនឌី ដោយភៀសខ្លួនចេញពីការប្រយុទ្ធគ្នា នៅភាគខាងកើតកុងហ្គោ។ ភាគច្រើន បានឆ្លងកាត់ភូមិ Gatumba ក្នុងស្រុក Mutimbuzi ខេត្ត Bujumbura ឬឆ្លងកាត់ទន្លេ Rusizi ចូលទៅក្នុងខេត្ត Bubanza និង Cibitoke។