បើយោងតាមអ្នកការទូតដែលដឹងពីកិច្ចពិភាក្សា បានប្រាប់ថា ក្រុមប្រទេសទាំង៧ (G7) កំពុងជួបការលំបាកក្នុងការឈានដល់ការព្រមព្រៀងគ្នា ជុំវិញសេចក្តីព្រាងសេចក្តីថ្លែងការណ៍ ដើម្បីប្រារព្ធខួបរយៈពេល ៣ឆ្នាំ ចាប់តាំងពីមានការលុកលុយរបស់រុស្ស៊ីលើអ៊ុយក្រែន ក្រោយសេចក្តីព្រាងដំបូង ត្រូវបានកែសម្រួលឲ្យស្រាលជាងមុន ពាក់ព័ន្ធនឹងសង្គ្រាមនេះ។

ការមិនយល់ឃើញស្របគ្នានេះ បានបង្ហាញពីការបែកបាក់កាន់តែអាក្រក់ទៅៗ ក្នុងចំណោមសម្ព័ន្ធមិត្ត ខណៈដែលប្រធានាធិបតីអាមេរិក លោក Donald Trump បន្តអនុវត្តការចរចាសន្តិភាពឯកតោភាគីជាមួយរុស្ស៊ី ក្នុងគោលបំណងបញ្ចប់ជម្លោះ ដោយគ្មានអឺរ៉ុប ឬអ៊ុយក្រែន។

សេចក្តីព្រាងចុងក្រោយបង្អស់ដែលត្រូវបានឃើញដោយសារព័ត៌មាន Bloomberg ចុះថ្ងៃទី១៩ ខែកុម្ភៈ រៀបរាប់ថា៖ «ការធានាសន្តិសុខយ៉ាងរឹងមាំ និងសមាហរណកម្មសហភាពអឺរ៉ុបរបស់អ៊ុយក្រែន នឹងមានសារៈសំខាន់ ក្នុងការទទួលបានសន្តិភាពយូរអង្វែងដែលការពារការលុកលុយ នាពេលអនាគត»។

នោះជាការប្រើភាសាស្រាលជាងសេចក្ដីព្រាងដំបូងដែលអំពាវនាវឲ្យមានសន្តិភាព «ដែលមិនផ្តល់រង្វាន់ដល់ការលុកលុយ ឬអនុញ្ញាតឲ្យបង្កើតសង្រ្គាម នាពេលអនាគត» តាមរយៈ «ការធានាសន្តិសុខយូរអង្វែង សម្រាប់អ៊ុយក្រែន ដោយមានកងទ័ព និងគ្រឿងយោទ្ធោបករណ៍ រួមជាមួយនឹងការតាមមើលជាអន្តរជាតិយ៉ាងរឹងមាំ ដើម្បីត្រួតពិនិត្យលក្ខខណ្ឌដែលបានព្រមព្រៀងគ្នា»។ ឯកសារយោង ចំពោះសមាហរណកម្មអាត្លង់ទិក ក៏ត្រូវបានដកចេញផងដែរ។

គួរបញ្ជាក់ថា G7 តែងតែនិយាយសំដៅទៅលុកលុយពេញលេញរបស់រុស្ស៊ីលើអ៊ុយក្រែន និងសង្គ្រាមឈ្លានពានប្រឆាំងនឹងប្រទេសជិតខាងរបស់ទីក្រុងមូស្គូថា ជា «ទង្វើខុសច្បាប់"» ជាអ្វីដែលសេចក្តីព្រាងដំបូង ក៏បានហៅបែបនោះដែរ។ ប៉ុន្តែសេចក្ដីព្រាងថ្មីបំផុត បានកែប្រែភាសានោះទៅជា «សង្គ្រាមបំផ្លិចបំផ្លាញដែលបានចាប់ផ្តើមជាមួយនឹងការលុកលុយរបស់រុស្ស៊ីលើអ៊ុយក្រែន»៕