ក្រុមអ្នកឃ្លាំមើលសង្គ្រាម បាននិយាយថា ជនស៊ីវិល ៧នាក់ ក្នុងនោះមានស្ត្រីម្នាក់ និងកុមារម្នាក់ ត្រូវបានសម្លាប់កាលពីថ្ងៃព្រហស្បតិ៍ នៅពេលដែលគ្រាប់ដែលនៅសេសសល់ បានផ្ទុះនៅខាងក្នុងផ្ទះមួយ នៅភាគពាយព្យនៃសាធារណរដ្ឋអារ៉ាប់ស៊ីរី។  

ក្រុមឃ្លាំមើលសិទ្ធិមនុស្សស៊ីរី បានរាយការណ៍ពីការបំផ្ទុះដ៏សាហាវនេះ មួយថ្ងៃបន្ទាប់ពីអង្គការមួយផ្សេងទៀត បាននិយាយថា ប្រជាជនស៊ីរីពីរភាគបី បានប្រថុយនឹងការស្លាប់ ឬរងរបួស ដោយសារគ្រាប់មិនទាន់ផ្ទុះ។

ក្រុមឃ្លាំមើលនេះ បាននិយាយថា៖«ជនស៊ីវិល ៧នាក់ ក្នុងនោះមានស្ត្រីម្នាក និងកុមារម្នាក់ ត្រូវបានសម្លាប់ នៅពេលដែលគ្រាប់ដែលនៅសេសសល់ ដែលត្រូវរក្សាទុក នៅក្នុងផ្ទះមួយ» នៅក្នុងខេត្ត Idlib បានផ្ទុះ ដោយបានបន្ថែមថា ចំនួនអ្នកស្លាប់ គឺជាចំនួនបណ្តោះអាសន្ន។

អ្នកឆ្លើយឆ្លងព័ត៌មាន AFP ម្នាក់ បានឃើញបុគ្គលិកការពារជនស៊ីវិល កំពុងធ្វើការយកកម្ទេចថ្ម និងទាញជនរងគ្រោះ ចេញពីផ្ទះដែលត្រូវបានបំផ្លាញដោយសារផ្ទុះគ្រាប់នោះ។

លោក Mohammed Ibrahim មកពីផ្នែកការពារជនស៊ីវិល នៅខេត្ត Idlib បាននិយាយថា ពួកគេបានទទួលរបាយការណ៍មួយ «អំពីការផ្ទុះគ្រាប់ដែលមិនស្គាល់ នៅក្នុងទីប្រជុំជន Nayrab ហើយនៅពេលដែលក្រុមធ្វើដំណើរទៅកាន់កន្លែងនោះ ពួកគេបានរកឃើញយុទ្ធភណ្ឌមិនទាន់ផ្ទុះ»។