អ្នកការទូតកំពូលរបស់សហភាពអឺរ៉ុប (EU) បានប្រាប់ឲ្យដឹងថា ប្លុកនេះ និងអាហ្រ្វិកខាងត្បូង កំពុងបង្កើតនូវទំនាក់ទំនងជិតស្និទ្ធជាងមុន បន្ទាប់ពីការខ្វែងគំនិតគ្នា កាលពីមុនមក បាននាំឲ្យការប្រាស្រ័យទាក់ទងគ្នាមានភាពអាប់អួ។

ការផ្សះផ្សាគ្នានេះ កើតមានឡើងនៅពេលដែលប្រធានាធិបតីអាមេរិក លោក Donald Trump ធ្វើឲ្យមានភាពរអាក់រអួលដល់ទំនាក់ទំនងជាមួយសម្ព័ន្ធមិត្ត តាមរយៈវិធានការជាច្រើន ក្នុងនោះរួមទាំងការគំរាមដំឡើងពន្ធ និងការព្យួរជំនួយផងដែរ។ នាពេលកន្លងមក អាហ្វ្រិកខាងត្បូងបានប្រឆាំងមិនស្របតាម EU ដោយបង្ហាញជំហរមិនចូលបក្សសម្ព័ន្ធ ជុំវិញការលុកលុយរបស់រុស្ស៊ីលើអ៊ុយក្រែន និងធ្វើជាម្ចាស់ផ្ទះនៃនាវាចម្បាំងរុស្ស៊ី និងចិន សម្រាប់សមយុទ្ធយោធា។

កាលពីថ្ងៃព្រហស្បតិ៍ (ទី២០ ខែកុម្ភៈ) ក្នុងទីក្រុង Johannesburg ប្រទេសអាហ្វ្រិកខាងត្បូង ជាកន្លែងដែលលោកស្រីកំពុងចូលរួមកិច្ចប្រជុំរដ្ឋមន្ត្រីការបរទេសនៃក្រុមប្រទេសទាំង ២០ ឬ G20 តំណាងជាន់ខ្ពស់របស់ EU ទទួលបន្ទុកកិច្ចការបរទេស និងគោលនយោបាយសន្តិសុខ គឺលោកស្រី Kaja Kallas បានប្រាប់អ្នកសារព័ត៌មានថា៖ «វាគឺជាពេលវេលាកសាងភាពជាដៃគូ និងពង្រឹងភាពជាដៃគូដែលយើងមាន។ ស្វែងរកមិត្តចាស់ និងបង្កើតមិត្តថ្មី»។

លោកស្រី Kallas បានសង្កត់ធ្ងន់បន្ថែមថា៖ «មិនថា ពួកយើងមានការខ្វែងគំនិតគ្នាយ៉ាងណានោះទេ ខ្ញុំយល់ថា រឿងទាំងនោះបានកន្លងផុតហើយ ហើយពួកយើងអាចដោះស្រាយបាន»។

ការផ្សះផ្សាគ្នានេះ គឺជាដំណឹងល្អ សម្រាប់អាហ្វ្រិកខាងត្បូង ដែលកំពុងត្រូវបានដាក់ទណ្ឌកម្មដោយលោក Trump បន្ទាប់ពីមេដឹកនាំអាមេរិករូបនេះ បានចោទប្រកាន់ប្រទេសនេះដោយមិនពិតថា បានរឹបអូសយកដីឯកជន៕