ក្រុមហ៊ុនអាកាសចរណ៍ បានផ្លាស់ប្តូរផ្លូវហោះហើររវាងប្រទេសអូស្រ្តាលី និងប្រទេសនូវែលសេឡង់នៅថ្ងៃសុក្រនេះ ក្រោយចិនជូនដំណឹងទៅអូស្រ្តាលីថា កងទ័ពជើងទឹកនៃកងទ័ពរំដោះប្រជាមានិតចិននឹងធ្វើសមយុទ្ធបាញ់គ្រាប់ពិតនៅជិតតំបន់ឆ្នេររដ្ឋ New South Wales ស្ថិតក្នុងដែនទឹកអន្តរជាតិ ដែលវាគឺជាព្រឹត្តការណ៍ដ៏កម្រមួយ ។

នាយករដ្ឋមន្រ្តីអូស្រ្តាលីលោក Anthony Albanese បាននិយាយប្រាប់ក្រុមអ្នកសារព័ត៌មាននៅរសៀលថ្ងៃសុក្រនេះថា រយៈពេលសម្រាប់សមយុទ្ធកងទ័ពជើងទឹកចិន បានផុតកំណត់ហើយ ហើយគេនៅមិនទាន់ដឹងច្បាស់នោះទេថាតើការបាញ់គ្រាប់ពិត ត្រូវបានធ្វើឡើងដោយកងទ័ពជើងទឹកចិនដែរឬយ៉ាងណានោះទេ ។

លោកនិយាយថា ចិនបានប្រាប់អនុលោមតាមសេចក្តីជូនដំណឹងថា ពួកគេនឹងធ្វើសមយុទ្ធទាំងនេះ រួមទាំងការប្រើប្រាស់ការបាញ់គ្រាប់ពិតដ៏មានសក្តានុពល ។ វាស្ថិតនៅក្រៅតំបន់សេដ្ឋកិច្ចដាច់មុខរបស់អូស្រ្តាលី និងស្ថិតនៅចម្ងាយ ៣៧០គ.មពីតំបន់ឆ្នេរ ។

លោក Anthony បន្តថា នាវា និងយន្តហោះ P-8 របស់អូស្រ្តាលី និងនូវែលសេឡង់ បានតាមដានកងនាវាចិន ខណៈពួកគេធ្វើដំណើរចុះតាមតំបន់ឆ្នេរអូស្រ្តាលី ។

គួរឲ្យដឹងថា កាលពីសប្តាហ៍មុន នាវាចម្បាំង នាវាល្បាត និងនាវាផ្គត់ផ្គង់របស់កងទ័ពជើងទឹកនៃកងទ័ពរំដោះប្រជាមានិតចិន បានបើកចូលជិតដែនសមុទ្រអូស្រ្តាលី និងបានធ្វើដំណើរចុះតាមតំបន់ឆ្នេរភាគខាងកើតអូស្រ្តាលីក្នុងសប្តាហ៍នេះ ៕