ទូរទស្សន៍រដ្ឋចិន CCTV រាយការណ៍ថា ក្រុមជនជាតិចិនចំនួន ២០០នាក់ដែលត្រូវបាននាំចេញពីមជ្ឈមណ្ឌលឆបោកនៅប្រទេសមីយ៉ាន់ម៉ា បានធ្វើដំណើរឆ្លងកាត់ប្រទេសថៃ ហើយត្រូវបានដឹកតាមយន្តហោះមកកាន់ប្រទេសចិនកាលពីថ្ងៃព្រហស្បតិ៍ ។

រូបភាពវីដេអូឃ្លីបពី CCTV ឃើញជនជាតិចិនសង្ស័យក្នុងករណីឆបោក បានចុះពីលើយន្តហោះនៅទីក្រុង Nanjing អមដោយក្រុមនគរបាល ។

CCTV រាយការណ៍ថា ជនជាតិចិន ៨០០នាក់ផ្សេងទៀត ដែលសង្ស័យពីករណីឆបោកដែរនោះ នឹងត្រូវនាំមកកាន់ប្រទេសចិន ក្នុងរយៈពេលប៉ុន្មានថ្ងៃទៀតនេះ ។

អង្គការសហប្រជាជាតិ(UN) បានរាយការណ៍ថា អស់រយៈពេលជាច្រើនឆ្នាំមកហើយដែលក្រុមឧក្រិដ្ឋជន បានជួញដូរមនុស្សរាប់ពាន់នាក់ទៅកាន់មជ្ឈមណ្ឌលឆបោកនៅទូទាំងតំបន់អាស៊ីអាគ្នេយ៍ រួមទាំងទីតាំងនៅតាមបណ្តោយព្រំដែនថៃ-មីយ៉ាន់ម៉ា បង្ខំឲ្យពួកគេធ្វើការលើប្រតិបត្តិការអនឡាញខុសច្បាប់ ។

CCTV រាយការណ៍ថា នេះគឺជាក្រុមជនជាតិចិនដំបូងគេជាប់ពាក់ព័ន្ធនឹងករណីឆបោក ត្រូវបាននិរទេសពីប្រទេសមីយ៉ាន់ម៉ា ឆ្លងកាត់ប្រទេសថៃ ធ្វើឲ្យវាក្លាយជាព្រឹត្តការណ៍ដ៏សំខាន់មួយសម្រាប់ការពង្រឹងច្បាប់អន្តរជាតិ ៕