ប្រជាពលរដ្ឋរស់នៅក្នុងទីក្រុង Sao Paulo ប្រទេសប្រេស៊ីល ទទួលបានទឹកដោយឥតគិតថ្លៃ ដើម្បីជួយឲ្យពួកគេមានជាតិទឹកក្នុងខ្លួន ពេលដែលសីតុណ្ហភាពហក់ឡើងខ្ពស់កាលពីថ្ងៃព្រហស្បតិ៍ ។

សីតុណ្ហភាពខ្ពស់បំផុតនៅក្នុងរដ្ឋធានី Sao Paulo ត្រូវបានចុះបញ្ជីកាលពីថ្ងៃទី ១៨ ខែកុម្ភៈកន្លងទៅ ពេលដែលសីតុណ្ហភាពកើនឡើងដល់ ៣៦,៩អង្សាសេ ហើយនិងថ្ងៃទី ១៧ ខែកុម្ភៈ ពេលដែលសីតុណ្ហភាពមធ្យមមានចំនួន ៣៤,២អង្សាសេ ។

ក្រុមអាជ្ញាធរក្រុង Sao Paulo បានចុះប្រតិបត្តិការ “សីតុណ្ហភាពខ្ពស់”ជាមួយនឹងការដាក់ពង្រាយបញ្ជតាមដងផ្លូវផ្តល់ទឹកដោយឥតគិតថ្លៃ និងការថែទាំសុខភាព ដើម្បីជួយអ្នកស្រុកកុំឲ្យខ្សោះជាតិទឹកក្នុងខ្លួន ពេលដែលពួកគេស៊ូទ្រាំនឹងរលកកម្តៅក្តៅខ្លាំងបែបនេះ ។

ដោយឡែក ទីក្រុង Rio de Janeiro បានកត់ត្រាថ្ងៃក្តៅបំផុតរបស់ខ្លួនក្នុងពេលយ៉ាងហោចណាស់មួយទសវត្សរ៍ នៅពេលសីតុណ្ហភាពឡើងដល់ ៤៤អង្សាសេ កាលពីថ្ងៃចន្ទដើមសប្តាហ៍នេះ ខណៈអ្នកស្រុកនាំគ្នាសម្រុកទៅលេងសមុទ្រដើម្បីស្វែងរកភាពត្រជាក់ដល់រាងកាយ ។

វាជាសីតុណ្ហភាពខ្ពស់បំផុតចាប់តាំងពីទីក្រុងភាគអាគ្នេយ៍របស់ប្រេស៊ីលមួយនេះ បានចាប់ផ្តើមប្រព័ន្ធប្រកាសអាសន្នអាកាសធាតុកាលពីជាង ១០ឆ្នាំមុន ។ 

សីតុណ្ហភាពខ្ពស់បំផុតទី ២ បានកើតឡើងនៅក្នុងខែវិច្ឆិកា ឆ្នាំ២០២៣ ពេលដែលសីតុណ្ហភាពកើនឡើងដល់ ៤៣,៨អង្សាសេ ។ 

មន្ត្រីក្រុងបានចេញសេចក្តីជូនដំណឹងអំពីកម្ដៅយ៉ាងក្ដៅគគុកសម្រាប់ប៉ុន្មានថ្ងៃខាងមុខនេះ ដោយរៀបចំបញ្ជផ្តល់ទឹក និងរៀបចំប្រព័ន្ធសុខាភិបាលសាធារណៈ ដើម្បីដោះស្រាយការកើនឡើងនៃករណីសុខភាពទាក់ទងនឹងកម្ដៅ ៕