កាលពីថ្ងៃព្រហស្បតិ៍ម្សិលមិញ កងទ័ពជើងទឹកម៉ិកស៊ិក បានរាយការណ៍ពីការរឹបអូសបានសារធាតុញៀនកូកាអ៊ីនទម្ងន់ជិត ២តោន នៅក្នុងសមុទ្រដែលមានតម្លៃប្រមាណជា ២៥លានដុល្លារ ។

យោងតាមការបញ្ចេញព័ត៌មានបានឲ្យដឹងថា ប្រតិបត្តិការរឹបអូសគ្រឿងញៀនសង្ស័យទាំងនេះ បានធ្វើឡើងនៅជិតតំបន់ឆ្នេរ Chiapas ជាទីដែលក្រុមអាជ្ញាធរកងទ័ពជើងទឹក តាមពីក្រោយទូកតូចសង្ស័យ ២គ្រឿង និងរឹបអូសបានម៉្សៅពណ៌ស.ចំនួន ៥៥ប្រអប់ ដែលគេសង្ស័យថាជាសារធាតុកូកាអ៊ីន មានទម្ងន់ប្រហែល ២តោន ។

គួរឲ្យដឹងថា កាលពីថ្ងៃចន្ទដើមសប្តាហ៍នេះ ម៉ិកស៊ិក បានប្រកាសផងដែរពីការរឹបអូសបានសារធាតុញៀនមេតំហ្វេតាមីនទម្ងន់ជិត ២០០គ.ក ក្រោយមានសំពាធកើនឡើងពីប្រធានាធិបតីសហរដ្ឋអាមេរិកលោក Donald Trump ឲ្យដោះស្រាយការជួញដូរគ្រឿងញៀនខុសច្បាប់ ។

ការរឹបអូសនេះ បានធ្វើឡើង អំឡុងប្រតិបត្តិការនាចុងសប្តាហ៍ ដើម្បីរុះរើមន្ទីរពិសោធន៍គ្រឿងញៀនខុសច្បាប់នៅរដ្ឋភាគពាយ័ព្យ Sinaloa ៕