វិមានក្រឹមឡាំង នៅថ្ងៃសុក្រ (ទី២១ ខែកុម្ភៈ) បានឲ្យដឹងថា មានការយោគយល់គ្នាទៅវិញទៅមក អំពីតម្រូវការ ដើម្បីឲ្យមានកិច្ចប្រជុំ រវាងប្រធានាធិបតីសហរដ្ឋអាមេរិក លោក Donald Trump និងប្រធានាធិបតីរុស្ស៊ី លោក Vladimir Putin ប៉ុន្តែថា ព័ត៌មានលម្អិតនៃការជួបគ្នាបែបនេះ មិនទាន់ត្រូវបានសម្រេចនៅឡើយទេ។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ភាគីទាំង២ បានព្រមព្រៀងគ្នា អំឡុងកិច្ចពិភាក្សា នៅទីក្រុងរីយ៉ាដ ប្រទេសអារ៉ាប់ប៊ីសាអូឌីត ក្នុងសប្តាហ៍នេះ ជាការជួបគ្នាដំបូងរបស់ពួកគេ ដើម្បីពិភាក្សាថា តើត្រូវបញ្ចប់សង្រ្គាមអ៊ុយក្រែនយ៉ាងដូចម្ដេច មុនពេលមានការចរចាផ្លូវការបន្ថែមទៀត ដែលមេដឹកនាំទាំង២ គួរតែជួបគ្នាផ្ទាល់ ប៉ុន្តែ «មិនទាន់មានព័ត៌មានលម្អិតនៅឡើយទេ»។ លោកបានកត់សម្គាល់ថា លោកប្រធានាធិបតីទាំង២ បាននិយាយថា ពួកលោកចង់ជជែកគ្នាដោយផ្ទាល់។

លោក Peskov បាននិយាយថា៖ «ប្រធានាធិបតីទាំង២ បានបង្ហាញពីបំណងប្រាថ្នាចង់ជួបគ្នា ហើយក៏មានការណែនាំរៀបចំកិច្ចប្រជុំនេះឲ្យបានល្អ ដើម្បីទទួលបានផលិតភាពតាមដែលអាចធ្វើទៅបាន។ ក្នុងអំឡុងពេលនៃការរៀបចំនេះ សេចក្ដីលម្អិតផ្សេងៗគ្រប់យ៉ាង នឹងត្រូវបានពិភាក្សា»។

បន្ទាប់ពីកិច្ចប្រជុំអារ៉ាប៊ីសាអូឌីតកាលពីថ្ងៃអង្គារដើមសប្ដាហ៍នេះ លោក Trump បាននិយាយថា លោកប្រហែលជានឹងជួបជាមួយលោក Putin មុនដំណាច់ខែនេះ។ ចំណែកលោក Putin បាននិយាយនៅថ្ងៃបន្ទាប់ថា កិច្ចប្រជុំចាំបាច់ត្រូវរៀបចំយ៉ាងប្រុងប្រយ័ត្ន ដើម្បីសម្រេចបានលទ្ធផលល្អ៕