កងទ័ពសមរភូមិមុខរបស់អ៊ុយក្រែន បាននិយាយថា ពួកគេបានប្តេជ្ញាចិត្តតស៊ូប្រយុទ្ធបន្តទៀត បន្ទាប់ពីរយៈពេលបីឆ្នាំនៃការលះបង់ដ៏ជូរចត់ និងការបាត់បង់យុទ្ធមិត្តរាប់ម៉ឺននាក់។

«យើងបានទៅដល់ចំណុចគ្មានវិលត្រឡប់ យើងបានលះបង់ច្រើនណាស់ យើងបានដាក់ទុនជីវិតយ៉ាងច្រើន ខណៈសង្រ្គាមនេះបានឆក់យកជីវិតមនុស្សយ៉ាងច្រើន យើងនឹងរកវិធី យើងនឹងប្រយុទ្ធរហូតដល់ទីបញ្ចប់ ពួកគេនឹងមិនអាចសម្លាប់ពួកយើងបានទាំងអស់គ្នានោះទេ។

ដោយកាន់កាំភ្លើងដើម្បីប្រយុទ្ធ ទាហានថ្មើរជើង បានរំលឹកពីការតស៊ូដ៏ខ្លាំងក្លារបស់អ៊ុយក្រែនក្នុងសប្តាហ៍ដំបូងនៃ ការវាយលុក កាលពីខែកុម្ភៈ ឆ្នាំ២០២២ មុនពេលការគាំទ្ររបស់ប្រទេសលោកខាងលិចចូលមក និងបាននិយាយថា វាអាចធ្វើឲ្យមានកិច្ចខិតខំប្រឹងប្រែងឡើងវិញ ប្រសិនបើចាំបាច់។

ការជំរុញរបស់ប្រធានាធិបតីសហរដ្ឋអាមេរិកលោក Donald Trump សម្រាប់សន្តិភាពឆាប់រហ័សជាមួយទីក្រុងមូស្គូ ក្នុងពេលបោះបង់ចោលអ៊ុយក្រែន បានបង្កឱ្យមានការព្រួយបារម្ភ និងកំហឹង ក្នុងចំណោមប្រជាជនអ៊ុយក្រែនជាច្រើននាក់ និងសម្ព័ន្ធមិត្តរបស់ខ្លួន។

ប្រធានាធិបតី លោក Volodymyr Zelenskiy បានច្រានចោលកិច្ចព្រមព្រៀងទាំងឡាយណា ដែលធ្វើឡើងនៅពីក្រោយអ៊ុយក្រែន ហើយបានស្វែងរកការធានាសន្តិសុខរឹងមាំពីដៃគូរបស់ទីក្រុងគីវ មុនពេលព្រមព្រៀងសន្តិភាពណាមួយ។