ស្វាយរៀង ÷ ប្រធានក្រុមការងារគណបក្សប្រជាជនកម្ពុជាចុះជួយស្រុករមាសហែក ខេត្តស្វាយរៀង ឯកឧត្តមសុខ សាកេន ក្នុងពិធីប្រកាសបែងចែកការងារជូនដល់មន្ត្រីក្រុមការងារគណបក្សថ្នាក់កណ្ដាលចុះជួយឃុំគោលដៅថ្ងៃទី២២ ខែកុម្ភះឆ្នាំ២០២៥នេះ បានណែនាំដល់ ឯកឧត្តម លោកជំទាវ លោក លោកស្រីមន្ត្រីថ្នាក់ដឹកនាំបក្ស ចុះជួយឃុំគោលដៅត្រូវរួមធ្វើផែនការ ការពារនិងអភិវឌ្ឍន៍ឃុំជាមួយនឹងរដ្ឋបាលមូលដ្ឋាន ឱ្យបានច្បាស់លាស់ដើម្បីបន្តជួយមូលដ្ឋានដែលនៅសេសសល់ពីក្រុមការងារចុះមូលដ្ឋានមុនអនុវត្តមិនទាន់ត្រូវបានបញ្ចប់។

 ឯកឧត្តមបានបញ្ជាក់បន្ថែមថាកិច្ចការរក្សាការពារសណ្ដាប់ធ្នាប់មូលដ្ឋាន ជាកិច្ចការចម្បងដែលក្រុមការងារថ្នាក់កណ្ដាលត្រូវតែគិតគូរជាមុនក្នុងការត្រៀមបង្ក្រាបខណៈដែលសភាពការណ៍បច្ចុប្បន្ននៅតាមមូលដ្ឋានបានរងឥទ្ធិពលពីការញុះញង់គ្រប់សកម្មភាពដែលទំនោរទៅរកការប្រឆាំងនិងការដឹកនាំរបស់រាជរដ្ឋាភិបាលក៏ដូចគណបក្ស ពិសេសក្មេងទំនើង ដើម្បីបញ្ជៀសបាននៅសកម្មភាពដែលជាកត្តានាំអោយរាំងស្ទះដល់ចលនាអភិវឌ្ឍន៍មូលដ្ឋាន។

 ទន្ទឹមនិងការរៀបចំធ្វើផែនការ ការពារនិងអភិវឌ្ឍន៍មូលដ្ឋាន ឯកឧត្តមប្រធានក្រុមការងារចុះជួយស្រុក បានណែនាំដល់មន្ត្រីបក្សថ្នាក់កណ្ដាល និងថ្នាក់មូលដ្ឋានត្រូវបន្តកសាងកម្លាំងស្នូលតាមរយះចលនាអប់រំយុវជនដល់អាយុនិងធ្វើការអូសទាញហែកកម្លាំងប្រឆាំងអោយមកទទួលការគាំទ្រពីគណបក្សប្រជាជនកម្ពុជាដើម្បីត្រៀមកម្លាំងឆ្ពោះទៅកាន់ការបោះឆ្នោតជូនគណបក្សប្រជាជនកម្ពុជាបន្តដឹកនាំប្រទេសជាតិទៅថ្ងៃអនាគត។