កាលពីថ្ងៃសៅរ៍ម្សិលមិញ ក្រុមហាម៉ាស់ បានដោះលែងចំណាប់ថ្នូរ ៦នាក់ ចេញពីតំបន់ហ្កាហ្សា ជាការដោះដូរនឹងអ្នកទោស និងអ្នកជាប់ឃុំឃាំងប៉ាឡេស្ទីនរាប់រយនាក់ ។

លោក Tal Shoham និងលោក Avera Mengistu ត្រូវបានដោះលែងមុនគេនៅទីក្រុង Rafah ស្ថិតនៅភាគខាងត្បូងតំបន់ហ្កាហ្សា ។

បន្ទាប់មកគឺលោក Eliya Cohen, Omer Shem Tov និងលោក Omer Wenkert ដែលពួកគេទាំង ៤នាក់នេះ ត្រូវបានចាប់ខ្លួននៅទីតាំងរៀបចំពិធីបុណ្យតន្រ្តី Nova អំឡុងការវាយប្រហារដ៏គួរភ្ញាក់ផ្អើលរបស់ក្រុមហាម៉ាស់កាលពីថ្ងៃទី ៧ ខែតុលា ឆ្នាំ ២០២៣ លើតំបន់សហគមន៍ភាគខាងត្បូងប្រទេសអ៊ីស្រាអែល ។

ពួកគេត្រូវបានប្រគល់ជូនក្រុមកាកបាទក្រហមនៅជំរំជនភៀសខ្លួន Nuseirat និងត្រូវបានបញ្ជូនទៅឲ្យកងកម្លាំងអ៊ីស្រាអែល ។

ក្រុមជីវពលរាប់សិបនាក់ បានឈរការពារនៅក្នុងចំណោមហ្វូងមនុស្សដែលជួបជុំគ្នាមើលការប្រគល់ចំណាប់ថ្នូរនេះ ស្របពេលដែលក្រុមហាម៉ាស់បិទមុខឈរកៀកស្មាគ្នា ៣នាក់ ។

ក្រោយមក ក្រុមហាម៉ាស់ បានប្រគល់ចំណាប់ថ្នូរទី ៦នៅទីក្រុងហ្កាហ្សា គឺលោក Hisham Al-Sayed ដោយគ្មានពិធីជាសាធារណៈនោះទេ ។

លោក Hisham Al-Sayed វ័យ ៣៦ឆ្នាំ និងលោក Avera Mengistu វ័យ ៣៩ឆ្នាំ បានឆ្លងកាត់ចូលតំបន់ហ្កាហ្សាដោយឯករាជ្យកាលពីរយៈពេល ១ទសវត្សរ៍មុន ហើយនិងត្រូវបានចាប់ខ្លួនឲ្យនៅទីនោះ ចាប់តាំងពីពេលនោះ ។

ចំណាប់ថ្នូរ ៦នាក់នេះដែរ គឺជាចំណាប់ថ្នូរនៅរស់ចុងក្រោយគេពីក្រុមចំណាប់ថ្នូរ ៣៣នាក់ ដែលគ្រោងនឹងត្រូវដោះលែងនៅដំណាក់កាលដំបូងនៃកិច្ចព្រមព្រៀងបទឈប់បាញ់រវាងអ៊ីស្រាអែល និងក្រុមហាម៉ាស់ ដែលបានចូលជាធរមានកាលពីថ្ងៃទី ១៩ ខែមករាកន្លងទៅ ។

សូមបញ្ជាក់ថា បទឈប់បាញ់ដ៏ផុយស្រួយនៅដែនដីហ្កាហ្សា បានអនុញ្ញាតឲ្យជនភៀសខ្លួនជាច្រើនក្នុងចំណោមពលរដ្ឋ ១,៩លាននាក់ ត្រឡប់ទៅតំបន់ដែលពួកគេបានភៀសខ្លួនវិញ ហើយក៏បានបន្ធូរបន្ថយភាពតានតឹងខ្លះនៅភាគខាងត្បូង និងកណ្តាលនៃតំបន់ហ្កាហ្សា ប៉ុន្តែដែនដីឡោមព័ទ្ធមួយនេះនៅតែត្រូវការជាបន្ទាន់នូវវិធីសាស្រ្តមនុស្សធម៌ដែលមានប្រសិទ្ធភាពជាងមុន ដើម្បីបន្ធូរបន្ថយទុក្ខវេទនារបស់ជនប៉ាឡេស្ទីន ៕