ក្រុមគ្រួសារអ្នកទោសប៉ាឡេស្ទីន បានរង់ចាំការដោះលែងមនុស្សជាទីស្រលាញ់របស់ពួកគេអស់រយៈពេលជាច្រើនម៉ោងកាលពីថ្ងៃសៅរ៍ នៅទីក្រុង Ramallah ស្របពេលដែលអ្នកទោស ៤០នាក់ គ្រោងនឹងដោះលែងទៅកាន់តំបន់វ៉េសប៊ែង ។

រយៈពេលជាច្រើនម៉ោង ក្រោយការដោះឡែងចំណាប់ថ្នូរអ៊ីស្រាអែល ៦នាក់ដែលត្រូវបានចាប់ខ្លួនដោយក្រុមហាម៉ាស់ អ៊ីស្រាអែលបានពន្យាពេលការដោះលែងអ្នកទោសប៉ាឡេស្ទីនជាង ៦០០នាក់ ដែលពួកគេបានយល់ព្រមដោះលែងនៅថ្ងៃសៅរ៍ ដោយសារអ្វីដែលការិយាល័យរបស់នាយករដ្ឋមន្រ្តីអ៊ីស្រាអែលនិយាយថា ជាការបំពានម្តងហើយម្តងទៀតដោយក្រុមជីវពលប៉ាឡេស្ទីន ។

លោក Bader abu Allia ដែលបានរង់ចាំការដោះលែងសមាជិកគ្រួសាររបស់លោក និយាយថាសមាជិកគ្រួសារបានបង្ហាញការខកចិត្តរបស់ពួកគេ ក្រោយរង់ចាំអស់រយៈពេលជាច្រើនម៉ោងក្រោមអាកាសធាតុត្រជាក់ខ្លាំង ។

លោកបន្តថា ពួកយើងបានមកជាមួយភរិយារបស់ពួកយើង កូនៗរបស់ពួកយើង ដូចដែលអ្នកឃើញស្រាប់ហើយនូវសមាជិកគ្រួសារទាំងអស់នេះ ហើយពួកយើងមានការភ្ញាក់ផ្អើលយ៉ាងខ្លាំង នៅពេលមានការពន្យាពេលបែបនេះ ។

ការិយាល័យរបស់លោកនាយករដ្ឋមន្រ្តី Benjamin Netanyahu និយាយនៅព្រឹកថ្ងៃអាទិត្យនេះថា រយៈពេលជាច្រើនម៉ោងក្រោយជនប៉ាឡេស្ទីនត្រូវបានដោះលែងក្រោមកិច្ចព្រមព្រៀងបទឈប់បាញ់ដ៏ផុយស្រួយរួចទៅហើយនោះ ការដោះលែងតាមកាលកំណត់ នឹងត្រូវពន្យាពេលរហូតដល់ការដោះលែងបន្ទាប់របស់ចំណាប់ថ្នូរអ៊ីស្រាអែលដែលទទួលបានដោយគ្មានការៀបចំពិធី ៕