កណ្ដាល៖ នៅយប់ថ្ងៃ១៥ ខែកត្តិក ពោលគឺត្រូវនឹងថ្ងៃទី២ នៃព្រះរាជពិធីបុណ្យអុំទូកនេះក្នុងឆ្នាំ២០២១នេះ បណ្ដាពលរដ្ឋមួយចំនួនធំបានរៀបចំពិធីអកអំបុក និងសំពះព្រះខែនៅតាមគេហដ្ឋានទៅតាមប្រពៃណីដូនតា ដែលបានរៀបចំប្រារព្ធតាំងពីបុរាណកាលមកជាធម្មតា។ ពលរដ្ឋនៅក្នុងក្រុងតាខ្មៅខេត្តកណ្ដាលបានថ្លែងថា ជារៀងរាល់ឆ្នាំនៅក្នុងផ្ទះរបស់គេគឺតែងតែរៀបចំពិធីអកអំបុក សំពះព្រះខែនេះមិនដែលអាក់ខានទេ ខណៈក្នុងរយៈពេល ២ឆ្នាំចុងក្រោយនេះការរៀបចំត្រូវបានកាត់បន្ថយដោយសារបញ្ហាកូវីដ-១៩។
ពលរដ្ឋថ្លែងថា ការរៀបចំពិធីអកអំបុក សំពះព្រះខែនៅតាមគេហដ្ឋានភាគច្រើន នៅក្នុងអំឡុងពេលនេះគឺគេរៀបចំដោយរៀបចំដាក់គ្រឿងសក្ការធូបទៀន ផ្កាភ្ញីផ្លែឈើនានា ដែលមានដាក់ជាមួយនូវអំបុកចេកទុំ ដូងខ្ចី និងមានជួបជុំសាច់ញាតិជិតឆ្ងាយធ្វើពិធីបួងសួង រួចហើយចែកអំបុកយ៉ាងសប្បាយផងដែរ។ សូមបញ្ជាក់ថា តាមដំណាលតគ្នាពីដូនតាខ្មែរ ពិធីអកអំបុក និងសំពះព្រះខែនេះ ត្រូវបានប្រជាពលរដ្ឋខ្មែរធ្វើឡើងដើម្បីរម្លឹកដល់ព្រះពោធិសត្វ ដែលយោងយកកំណើតជាទន្សាយ ដោយគ្រានោះព្រះអង្គបានលះបង់អាយុសង្ខារដល់ព្រះឥន្ទ្រាធិរាជ ដើម្បីបំពេញទានបារមី។ រឿងរ៉ាវនេះត្រូវបានដូនតាខ្មែរតែងមានដំណាលតៗគ្នាជារៀងរហូតដល់បច្ចុប្បន្ន។
សូមបញ្ជាក់ថា ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែសម្រាប់ឆ្នាំ ២០២១ នេះនឹងមិនអនុញ្ញាតឱ្យមានការប្រារព្ធដូចឆ្នាំមុនៗឡើយ ដោយសារតែការរីករាលដាលនៃមេរោគកូវីដ-១៩។ ប៉ុន្តែការដើរកម្សាន្តរបស់បងប្អូនប្រជាពលរដ្ឋភ្នំពេញ និងតាមបណ្ដាខេត្តត្រូវបានគេឃើញថា មានចំនួនច្រើនគួរឱ្យកត់សម្គាល់។ ក្នុងនោះពិធីសាសនាក្នុងអំឡុងពេលនៃពិធីបុណ្យអុំទូក តួយ៉ាងពិធីដាលអំបុក និងសំពះព្រះខែនៅតាមទីវត្តអារាម តាមបណ្ដាភូមិស្រុក និងគេហដ្ឋានរបស់ប្រជាពលរដ្ឋ គេឃើញមានប្រារព្ធឡើងតាមលំអានទំនៀមបូរាណខ្មែរ៕
អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
