ភ្នំពេញ៖ ក្នុងអំឡុងថ្ងៃឈប់សម្រាកបុណ្យអុំទូកនេះ រមណីយដ្ឋានកៀនស្វាយទាក់ទាញភ្ញៀវទេសចរជាច្រើន ចូលទស្សនាកម្សាន្តលំហែកាយ ខណៈអាជ្ញាធរមូលដ្ឋានបានចុះណែនស្ដីពីការកំណត់តម្លៃសេវាម្ហូបអាហារ ភ្ជាប់ជាមួយការអនុវត្តវិធានអនាម័យសុខាភិបាល ៣កុំ ៣ការពារ។
បើតាមលោកស្រី វ៉ែន សុខលី អ្នកផ្តល់សេវាផ្ទះទឹក និងអាហារនៅក្នុងរមណីយដ្ឋានកៀនស្វាយបានថ្លែងប្រាប់ BTV នៅព្រឹកថ្ងៃទី២០ ខែវិច្ឆិកានេះថា ក្នុងអំឡុងថ្ងៃឈប់សម្រាកបុណ្យអុំទូក ៣ថ្ងៃនេះ រមណីយដ្ឋានកៀនស្វាយក្រៅមានលភ្ញៀវទេសចរជិតឆ្ងាយមកទស្សនាជាច្រើន ហើយភ្ញៀវដែលមកទទួលសេវាអង្គុយកម្សាន្តតាមកញ្ចុះ ភាគច្រើនគឺមានចាប់ពីម៉ោង ១២ថ្ងៃត្រង់រហូតដល់ពេលល្ងាច។ លោកស្រី បន្តថា ដោយសារបណ្តាអាជីវករអ្នកលក់ដូរ និងអ្នកផ្តល់សេវានានានៅក្នុងរមណីយដ្ឋាននេះ បានទទួលណែនាំច្រើនពីសំណាក់អាជ្ញាធរគ្រប់ជាន់ថ្នាក់ បានធ្វើអោយការលក់ដូរនៅទីនេះគឺបានកំណត់តំលៃផ្តល់សេវានៅកម្រិតមួយដូចៗគ្នា ដែលជាការរួមចំណែកមួយធ្វើអោយភ្ញៀវមកទស្សនាច្រើននៅក្នុងអំឡុងពេលនេះដែរ។
បើតាមភ្ញៀវដែលបានទៅកម្សាន្តនៅរមណីយដ្ឋានខាងលើនេះបានថ្លែងថា រមណីយដ្ឋានកៀនស្វាយបច្ចុប្បន្នបានទទួលការអភិវឌ្ឍន៍ និងមានការកែប្រែច្រើន ជាពិសេសការកំណត់តំលៃសេវា និងការមានបរិស្ថានស្អាតទាក់ទាញ។ បើតាមលោក មាន ណាត ប្រធានក្រុមប្រឹក្សាភូមិធំស្រុកកៀនស្វាយបានថ្លែងថា ក្នុងរយៈពេល ២ថ្ងៃនៃថ្ងៃឈប់សម្រាកបុណ្យអុំទូកនេះ មានភ្ញៀវទេសចរឆ្ងាយជិតមកទស្សនាកម្សាន្តកើនរហូតដល់ជាង ៣ម៉ឺននាក់។ ក្នុងរយៈពេល ២ថ្ងៃមកនេះ អាជ្ញាធរបានរៀបចំការប្រណាំងទូកនៅលើទឹកស្ទឹងកោះប្រាក់ ដែលទទួលបានភ្ញៀវមកទស្សនាច្រើន ហើយភ្ញៀវក៏បានបន្តទៅកម្សាន្តលំហែកាយនៅរមណីយដ្ឋានកៀនស្វាយក្រៅ។ លោក មាន ណាត បន្តថា គ្រប់គោលដៅដែលភ្ញៀវទៅកម្សាន្តច្រើននោះ គឺអាជ្ញាធរបានណែនាំអោយអាជីវករ និងអ្នកផ្តល់សេវាកម្មផ្សេងៗទាំងអស់រួមគ្នាគិតគូតំលៃសេវាកុំអោយថ្លៃពេក និងត្រូវរួមគ្នាអនុវត្តវិធានអនាម័យ ៣កុំ ៣ការពារអោយបានល្អប្រសើរចៀសវាងការឆ្លងមេរោគកូវីដ១៩៕
អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
