អ៊ុយក្រែន ឈានចូលដល់ឆ្នាំទីបួននៃសង្គ្រាមជាមួយរុស្ស៊ី នៅថ្ងៃចន្ទ (២៤ កុម្ភៈ) នេះ ខណៈទីក្រុងគីវ ស្ថិតក្នុងស្ថានភាពស្រពេចស្រពិលដោយមិនប្រាកដថា ខ្លួនអាចពឹងពាក់លើសម្ព័ន្ធមិត្តដ៏រឹងមាំបំផុតរបស់ខ្លួន គឺសហរដ្ឋអាមេរិក បានទៀតឬយ៉ាងណាទេ ស្របពេលកងទ័ពដែលហត់នឿយរបស់ខ្លួន បន្តប្រយុទ្ធដើម្បីទប់ទល់នឹងរុស្ស៊ី ដែលវាយរុលមិនឈប់ឈរ។

ការគាំទ្ររបស់ទីក្រុងវ៉ាស៊ីនតោន កាន់តែអាប់អួរនៅពេលដែលលោកប្រធានាធិបតីអាមេរិក Donald Trump និងមេដឹកនាំអ៊ុយក្រែន លោក Volodymyr Zelenskiy បានប៉ះទង្គិចពាក្យសម្ដីគ្នាយ៉ាងខ្លាំងកាលពីសប្តាហ៍មុន។

លើសពីសង្គ្រាមពាក្យសម្តីនេះ ក្រុមមន្ត្រីអាមេរិកបានបើកកិច្ចពិភាក្សាដោយផ្ទាល់ជាមួយភាគីរុស្ស៊ី នៅអារ៉ាប៊ីសាអ៊ូឌីត កាលពីសប្តាហ៍មុន ដោយមិនរួមបញ្ជូលទីក្រុងគីវ និងអឺរ៉ុបឡើយ ក្នុងការផ្លាស់ប្តូរគោលនយោបាយដ៏ភ្ញាក់ផ្អើលស្តីពីសង្រ្គាម ដែលខួបលើកទី៣ របស់ខ្លួននៅថ្ងៃចន្ទនេះ។

ដោយមានការរំជើបរំជួលដោយខែដំបូងនៃតំណែងរបស់លោក Trump បណ្ដាមេដឹកនាំអឺរ៉ុបជាច្រើននឹងធ្វើទស្សនកិច្ចនៅរដ្ឋធានីអ៊ុយក្រែន ដើម្បីរំលឹកខួបនៃជម្លោះដ៏បង្ហូរឈាមបំផុតនៅក្នុងទ្វីបអឺរ៉ុប ចាប់តាំងពីសង្គ្រាមលោកលើកទីពីរមក ជាមួយនឹងលោក Zelenskiy។

ពលរដ្ឋអ៊ុយក្រែនរាប់ពាន់នាក់បានស្លាប់ និងជាង ៦លាននាក់ រស់នៅជាជនភៀសខ្លួននៅបរទេស ចាប់តាំងពីប្រធានាធិបតីរុស្ស៊ី លោក Vladimir Putin បានបញ្ជាឱ្យបើកប្រតិបត្តិការយោធាតាមផ្លូវគោក សមុទ្រ និងផ្លូវអាកាសលើអ៊ុយក្រែន។ ការខាតបង់ផ្នែកយោធាគឺជាតួលេខយ៉ាងមហន្តរាយ ទោះបីជារឿងនោះនៅតែរក្សាជាការសម្ងាត់យ៉ាងជិតក៏ដោយ។ ការប៉ាន់ប្រមាណសាធារណៈរបស់លោកខាងលិច ផ្អែកលើរបាយការណ៍ចារកម្ម មានភាពខុសប្លែកគ្នាយ៉ាងទូលំទូលាយ ប៉ុន្តែភាគច្រើននិយាយថា មនុស្សរាប់សែននាក់ត្រូវបានសម្លាប់ ឬរងរបួសនៅភាគីជម្លោះទាំងសងខាង។

សោកនាដកម្មនេះក៏បានប៉ះពាល់ដល់ក្រុមគ្រួសារនៅគ្រប់ទាំងអស់នៃអ៊ុយក្រែន ដែលពិធីបុណ្យសពយោធាគឺជារឿងធម្មតាទៅហើយក្នុងទីក្រុងធំៗ និងភូមិឆ្ងាយៗ។ មនុស្សម្នាហត់នឿយនឹងសម្រាកមិនលក់នៅពេលយប់ ដែលស៊ីរ៉ែនវាយប្រហារតាមអាកាសលាន់លឺស្ទើតែរាល់ថ្ងៃ៕