ក្រុមអ្នកស្រុកហ្កាហ្សាសង្ឃឹមថាដំណាក់កាលទីពីរនៃកិច្ចព្រមព្រៀងឈប់បាញ់នឹងត្រូវបានអនុវត្តឱ្យបានឆាប់តាមដែលអាចធ្វើទៅបាន បន្ទាប់ពីបានមើលឃើញការប្រគល់ចំណាប់ខ្មាំងអ៊ីស្រាអែលដែលត្រូវបានចាប់ខ្លួនដោយក្រុមហាម៉ាសកាលពីថ្ងៃសៅរ៍។

ចំណាប់ខ្មាំងអ៊ីស្រាអែលសរុបចំនួន ៦ នាក់ត្រូវបានប្រគល់ទៅឱ្យគណៈកម្មាធិការកាកបាទក្រហមអន្តរជាតិ (ICRC) នៅក្នុងទីតាំងចំនួន៣ ក្នុងតំបន់ហ្កាហ្សាកាលពីថ្ងៃសៅរ៍ចុងសប្ដាហ៍មុន គឺទីក្រុងរ៉ាហ្វា ភាគខាងត្បូងហ្កាហ្សា  ទីក្រុងហ្កាហ្សាភាគខាងជើង និងជំរំជនភៀសខ្លួន al-Nuseirat ។

ការដោះលែងនេះគឺជាផ្នែកមួយនៃការដោះដូររវាងចំណាប់ខ្មាំង និងអ្នកទោសលើកទីប្រាំពីរ និងចុងក្រោយក្នុងដំណាក់កាលទី ១ នៃកិច្ចព្រមព្រៀងបទឈប់បាញ់អ៊ីស្រាអែល-ហាម៉ាស។ 

ដំណាក់កាលដំបូងនៃកិច្ចព្រមព្រៀងបទឈប់បាញ់អ៊ីស្រាអែល-ហាម៉ាស បានចាប់ផ្តើមនៅថ្ងៃទី ១៩ខែមករា មានរយៈពេល៤២ ថ្ងៃដែលមើលឃើញការដកកងទ័ពអ៊ីស្រាអែលចេញពីតំបន់ហ្កាហ្សា និងការដោះលែងចំណាប់ខ្មាំងរវាងភាគីទាំងពីរ។

ភ្លៀងធ្លាក់នៅពេលចំណាប់ខ្មាំងត្រូវបានដោះលែងនៅក្រុង Rafah ប៉ុន្តែអាកាសធាតុអាប់អួនេះពុំអាចរារាំងអ្នកស្រុកហ្កាហ្សា រាប់ពាន់នាក់មិនឲ្យចេញទៅចូលរួមព្រឹត្តិការណ៍នេះទេ ដោយអ្នកខ្លះបង្ហាញពីក្តីសង្ឃឹមសម្រាប់សន្តិភាព។

អ្នកស្រុកម្នាក់បាននិយាយថា ពួកគេនៅទីនេះនៅថ្ងៃនេះដើម្បីធ្វើជាសាក្សីនៃការប្រគល់ចំណាប់ខ្មាំង ចុងក្រោយក្នុងដំណាក់កាលទី១ នៃកិច្ចព្រមព្រៀងបទឈប់បាញ់។ ពួកគេសង្ឃឹមថាដំណាក់កាលទី ២ នៃកិច្ចព្រមព្រៀងនឹងឈានដល់ក្នុងពេលឆាប់ៗនេះ ដែលនាំមកនូវការបញ្ចប់ជម្លោះ និងធានាថាប្រជាជនក្នុងតំបន់នេះ អាចរស់នៅដោយសន្តិភាព។ ការផ្លាស់ទីលំនៅរយៈពេល ៧ ឬ ៨ ទស្សវត្ស មកនេះគឺហួសពីការគ្រប់គ្រាន់ហើយ។ដល់ពេលហើយដើម្បីសម្រេចបាននូវសន្តិភាពយូរអង្វែង និងបញ្ចប់សង្គ្រាមក្នុងដែនដីមួយនេះ៕