ទីភ្នាក់ងារជាច្រើនរបស់សហរដ្ឋអាមេរិក បានប្រាប់បុគ្គលិកកុំឱ្យឆ្លើយតបភ្លាមៗទៅនឹងការទាមទាររបស់ទីប្រឹក្សាប្រធានាធិបតី របស់លោក Donald Trump គឺលោក Elon Musk ដើម្បីឱ្យរាយបញ្ជីស្នាដៃរបស់ពួកគេក្នុងសប្តាហ៍កន្លងទៅនេះ បើមិនដូច្នេះនឹងត្រូវបានបណ្តេញចេញពីការងារ ខណៈជាយុទ្ធនាការដ៏វឹកវរដើម្បីជម្រុះចោលកម្លាំងការងាររបស់សហព័ន្ធ។

មន្ត្រីដែលត្រូវបានតែងតាំងដោយរដ្ឋបាលរបស់លោក Trump នៅទីភ្នាក់ងារ FBI និងក្រសួងការបរទេសបានផ្ញើសារអេឡិចត្រូនិកទៅកាន់បុគ្គលិក ដោយប្រាប់ពួកគេកុំឆ្លើយតបសារ ជាសញ្ញាដែលអាចកើតមាននូវភាពតានតឹងរវាងសមាជិកនៃរដ្ឋបាលគណបក្សសាធារណៈរដ្ឋនិងមាហាសេដ្ឋីពិភពលោករូបនេះ នៅក្នុងយុទ្ធនាការរបស់ខ្លួនដើម្បីកាត់បន្ថយការងារស៊ីវិលសហព័ន្ធដែលមានកម្លាំង២,៣លាននាក់។

លោក Musk បានដឹកនាំដែលគេហៅថាក្រសួងប្រសិទ្ធភាពរដ្ឋាភិបាល នៅក្នុងសប្តាហ៍ដំបូងនៃរដ្ឋបាលរបស់លោក Trump បានបញ្ឈប់បុគ្គលិកជាង២០.០០០នាក់។

ល្បឿនដ៏តក់ក្រហល់ បាននាំឱ្យរដ្ឋាភិបាលសហព័ន្ធក្នុងករណីមួយចំនួន ប្រញាប់ប្រញាល់ជួលបុគ្គលិកឡើងវិញ នូវអ្នកដែលបំពេញមុខងារសំខាន់ៗដូចជាការធានាឃ្លាំងអាវុធនុយក្លេអ៊ែររបស់ប្រទេស និងការព្យាយាមដើម្បីប្រយុទ្ធប្រឆាំងការរាលដាលជំងឺផ្តាសាយបក្សីដែលកាន់តែធ្ងន់ធ្ងរ ។

បុគ្គលិកសហព័ន្ធ បានទទួលសារអេឡិចត្រូនិកមួយ ដែលណែនាំពួកគេឱ្យបញ្ជាក់លម្អិតអំពីការងារដែលពួកគេបានធ្វើក្នុងសប្តាហ៍កន្លងទៅ ភ្លាមៗបន្ទាប់ពី លោក Musk បានបង្ហោះនៅលើគេហទំព័របណ្តាញផ្សព្វផ្សាយសង្គម X របស់លោកថា ការខកខានមិនបានឆ្លើយតបសារ នឹងត្រូវបានចាត់ទុកថាជាការលាលែងពីតួនាទី។