រដ្ឋមន្ត្រីក្រសួងការពារជាតិជប៉ុន លោក Gen Nakatani បានទៅធ្វើទស្សកិច្ចនៅមូលដ្ឋានយោធាមួយកន្លែងក្នុងខេត្ត La Union ភាគខាងជើងរដ្ឋធានីម៉ានីល ប្រទេសហ្វីលីពីន កាលពីថ្ងៃអាទិត្យ ទី២៣ ខែកុម្ភៈ ដើម្បីពិនិត្យមើលប្រព័ន្ធរ៉ាដាឃ្លាំមើលដែនអាកាសចល័ត ដែលប្រទេសជប៉ុនបានបញ្ជូនទៅ ជាផ្នែកមួយនៃកតិកាសញ្ញាការពារព្រំដែនដ៏សំខាន់ដែលបានព្រមព្រៀងគ្នា កាលពីឆ្នាំមុន រវាងប្រទេសទាំងពីរ។

ប្រទេសជប៉ុន និងហ្វីលីពីន បានចុះហត្ថលេខាលើកិច្ចព្រមព្រៀងជំនួយសន្តិសុខចំនួន១,៦ពាន់លានយ៉េន ឬ១០,៦៥លានដុល្លារ កាលពីខែធ្នូ ឆ្នាំ២០២៤ ដើម្បីបង្កើនសន្តិសុខដែនសមុទ្រ និងសមត្ថភាពឃ្លាំមើលរបស់ប្រទេសនៅអាស៊ីអាគ្នេយ៍នេះ ក្នុងពេលមានភាពតានតឹងកើនឡើងនៅសមុទ្រចិនខាងត្បូង។

កាលពីខែកក្កដា ប្រទេសទាំងពីរ បានចុះហត្ថលេខាលើកតិកាសញ្ញាយោធាដ៏សំខាន់មួយ ដែលអនុញ្ញាតឱ្យមានការដាក់ពង្រាយកងកម្លាំងនៅលើទឹកដីរបស់ប្រទេសទាំងពីរទៅវិញទៅមក ធ្វើឱ្យកិច្ចសហប្រតិបត្តិការយោធារវាងប្រទេសទាំងពីរ មានភាពរលូន។ ទាំងប្រទេសហ្វីលីពីន និងជប៉ុន ដែលជាសម្ព័ន្ធមិត្តនៅអាស៊ីដ៏ជិតស្និទ្ធបំផុតរបស់សហរដ្ឋអាមេរិក បានប្រកាន់ខ្ជាប់នូវខ្សែបន្ទាត់ដ៏រឹងមាំប្រឆាំងអ្វីដែលពួកគេមើលឃើញថាជាអាកប្បកិរិយាឈ្លានពានរបស់នាវារបស់ប្រទេសចិន ក្នុងពេលមានជម្លោះដែលមានអាយុកាលរាប់ទសវត្សរ៍មកហើយ ជុំវិញអធិបតេយ្យភាពដែនសមុទ្រ។

កាលពីថ្ងៃអាទិត្យ លោក Nakatani បានបង្ហាញប្រព័ន្ធរ៉ាដាតាមតំបន់ឆ្នេរ ក្រោមកម្មវិធីជំនួយសន្តិសុខក្រៅប្រទេសរបស់ខ្លួន ដើម្បីបង្កើនសមត្ថភាពយល់ដឹងអំពីដែនសមុទ្ររបស់ខ្លួន។ កងទ័ពអាកាសប្រទេសហ្វីលីពីន ក៏ទទួលបានឧបករណ៍សម្រាប់គាំទ្រប្រព័ន្ធរ៉ាដាឃ្លាំមើលដែនអាកាសរបស់ខ្លួន ដោយបង្កើនសមត្ថភាពតាមដាន។