យោងតាមសេចក្តីថ្លែងការណ៍រួម ដែលបានចេញផ្សាយបានឲ្យដឹងថា ប្រទេសអេត្យូពី និងសូម៉ាលី បានកំណត់ពេលដើម្បីបង្កើត «ស្ថានភាពនៃកិច្ចព្រមព្រៀងកងកម្លាំង» សម្រាប់កងកម្លាំងទ្វេភាគីរបស់ខ្លួន ដែលនឹងធ្វើប្រតិបត្តិការនៅក្នុងប្រទេសសូម៉ាលី។

កិច្ចព្រមព្រៀងនេះ បានធ្វើឡើងបន្ទាប់ពីកិច្ចពិភាក្សារវាងនាយករដ្ឋមន្ត្រីរបស់ប្រទេសអេត្យូពី លោក Abiy Ahmed និងប្រធានាធិបតីប្រទេសសូម៉ាលី លោក Hassan Sheikh Mohamud នៅទីក្រុង Addis Ababa រដ្ឋធានីប្រទេសអេត្យូពី កាលពីថ្ងៃទី ១៤ ដល់ថ្ងៃទី១៦ ខែកុម្ភៈ និងកិច្ចពិភាក្សាជាបន្តបន្ទាប់ រវាងមេបញ្ជាការកងទ័ពនៃប្រទេសជិតខាងទាំងពីរ នៅទីក្រុង Mogadishu រដ្ឋធានីប្រទេសសូម៉ាលី។

ប្រទេសអេត្យូពី គឺជាអ្នករួមចំណែកកងទ័ពដ៏សំខាន់ ដល់បេសកកម្មបណ្តោះអាសន្នរបស់សហភាពអាហ្រ្វិក នៅប្រទេសសូម៉ាលី (ATMIS) ដែលបានធ្វើប្រតិបត្តិការពីឆ្នាំ២០២២ ដល់ឆ្នាំ២០២៤។ បេសកកម្ម ATMIS ត្រូវបានដាក់ជំនួសដោយបេសកកម្មគាំទ្រនិងស្ថិរភាពសហភាពអាហ្វ្រិក នៅប្រទេសសូម៉ាលី (AUSSOM) ចាប់តាំងពីខែមករា ឆ្នាំ២០២៥។

គណៈប្រតិភូដឹកនាំដោយ លោក Birhanu Jula នាយសេនាធិការនៃកងកម្លាំងការពារជាតិប្រទេសអេត្យូពី (ENDF) បានធ្វើទស្សនកិច្ចការងាររយៈពេលមួយថ្ងៃនៅប្រទេសសូម៉ាលី។ គណៈប្រតិភូអេត្យូពីបានពិភាក្សាជាមួយមន្ត្រីរបស់ប្រទេសសូម៉ាលី លើមធ្យោបាយពង្រឹងកិច្ចសហប្រតិបត្តិការទ្វេភាគីក្នុងការប្រយុទ្ធប្រឆាំងក្រុមអាល់សាបាប និងការរក្សាសន្តិភាព សន្តិសុខ និងស្ថិរភាពនៅតំបន់ញកអាហ្វ្រិក។

សេចក្តីថ្លែងការណ៍រួមបាននិយាយថា មេបញ្ជាការកងទ័ពបានស្វាគមន៍ចំពោះការចាប់ផ្តើមនៃបេសកកម្មគាំទ្រ និងស្ថិរភាពសហភាពអាហ្វ្រិក នៅប្រទេសសូម៉ាលី (AUSSOM) និងបានលើកឡើងពីសារៈសំខាន់នៃការកសាងស្នារដៃដែលបានធ្វើឡើងដោយបេសកកម្មបណ្តោះអាសន្នរបស់សហភាពអាហ្រ្វិក នៅប្រទេសសូម៉ាលី (ATMIS)មុន របស់ខ្លួន។