លោក Osama Rabie ប្រធានអាជ្ញាធរព្រែកជីកស៊ុយអេ (SCA) បានប្រកាសកាលពីថ្ងៃអាទិត្យថា នាវាចំនួន ៤៧គ្រឿង បានផ្លាស់ប្តូរផ្លូវរបស់ពួកគេ ដើម្បីឆ្លងកាត់ព្រែកជីកស៊ុយអេ ជំនួសផ្លូវតាមឆ្នេរសមុទ្រ Cape of Good Hope ចាប់តាំងពីដើមខែកុម្ភៈ។

លោក Rabie បានធ្វើសេចក្តីប្រកាសនេះ ក្នុងអំឡុងពេលចូលរួម ក្នុងការបើកសន្និសិទដឹកជញ្ជូននិងទំនិញតាមសមុទ្រអន្តរជាតិប្រចាំឆ្នាំលើកទី១៤ ដែលបានធ្វើឡើងនៅទីក្រុង Alexandria ប្រទេសអេហ្ស៊ីប។ នេះបើយោងតាមសេចក្តីថ្លែងការណ៍ដែលចេញផ្សាយដោយអាជ្ញាធរព្រែកជីកស៊ុយអេ(SCA)។

លោកបានបញ្ជាក់ថា ការពិភាក្សាដែលកំពុងបន្តជាមួយក្រុមហ៊ុនដឹកជញ្ជូន រួមជាមួយនឹងសញ្ញាវិជ្ជមាននៃស្ថិរភាព នៅក្នុងតំបន់សមុទ្រក្រហម បានបណ្តាលឲ្យមាននាវាចំនួន ៤៧គ្រឿង បានផ្លាស់ប្តូរផ្លូវរបស់ពួកគេ ក្នុងខែនេះ ដើម្បីឆ្លងកាត់ព្រែកជីកស៊ុយអេ ជំនួសផ្លូវតាមឆ្នេរសមុទ្រ Cape of Good Hope។

លោក Rabie បានសម្តែងសុទិដ្ឋិនិយមថា ក្រុមហ៊ុនដឹកជញ្ជូនកាន់តែច្រើន នឹងបន្តប្រើប្រាស់ព្រែកជីក Suez ខណៈដែលស្ថិរភាពក្នុងតំបន់ នៅតែបន្ត។

លោកបានសង្កត់ធ្ងន់ថា វិបត្តិសមុទ្រក្រហម បានបង្ហាញពី «បញ្ហាប្រឈមសន្តិសុខដែលមិនធ្លាប់មានពីមុនមក» ដល់តំបន់នេះ ដែលជះឥទ្ធិពលអវិជ្ជមានដល់ស្ថិរភាព និងនិរន្តរភាពនៃខ្សែច្រវ៉ាក់ផ្គត់ផ្គង់ពិភពលោក។

ប្រាក់ចំណូលពីព្រែកជីកស៊ុយអេ បានជួបប្រទះនឹងការធ្លាក់ចុះជាង ៦០% ក្នុងឆ្នាំ ២០២៤ ស្មើនឹងប្រមាណ ៧ ពាន់លានដុល្លារអាមេរិក ដោយសារភាពតានតឹងនៅសមុទ្រក្រហម និងច្រកសមុទ្រ Bab al-Mandab។

ភាពតានតឹងបានកើតឡើងនៅសមុទ្រក្រហម បន្ទាប់ពីក្រុមហ៊ូទី នៅប្រទេសយេម៉ែន បានចាប់ផ្តើមវាយប្រហារលើនាវាដែលមានទំនាក់ទំនងជាមួយអ៊ីស្រាអែល នៅក្នុងខែតុលា ឆ្នាំ ២០២៣ ដើម្បីបង្ហាញពីសាមគ្គីភាពជាមួយតំបន់ហ្កាហ្សា ក្នុងអំឡុងពេលជម្លោះរវាងក្រុមហាម៉ាសនិងអ៊ីស្រាអែល។