សារព័ត៌មានThe Globe and Mail បានរាយការណ៍ដោយដកស្រង់ប្រភពមួយថា នាយករដ្ឋមន្ត្រីកាណាដា លោក ចាស្ទីន ទ្រូដូ (Justine Trudeau) បានសន្ទនាតាមទូរស័ព្ទ ជាមួយប្រធានាធិបតីអាមេរិក លោក ដូណាល់ ត្រាំ (Donald Trump) បានគូសបញ្ជាក់ពីតម្រូវការ ក្នុងការរួមបញ្ចូលការធានាសន្តិសុខសម្រាប់អ៊ុយក្រែន នៅក្នុងកិច្ចព្រមព្រៀងសន្តិភាពណាមួយ ជាមួយរុស្ស៊ី។

យោងតាមប្រភពដដែល លោកនាយករដ្ឋមន្ត្រីកាណាដា បានសង្កត់ធ្ងន់ថា មនុស្សគ្រប់គ្នាចង់ឲ្យជម្លោះនេះត្រូវបញ្ចប់ ប៉ុន្តែវាចាំបាច់ ដើម្បីធ្វើឲ្យប្រាកដថា៖«កិច្ចព្រមព្រៀងសន្តិភាពណាមួយសម្រាប់អ៊ុយក្រែន ផ្តល់នូវការធានាសន្តិសុខ និងរារាំងរុស្ស៊ីពីការប្រើប្រាស់កម្លាំងយោធា ដើម្បីពង្រីកទឹកដីរបស់ខ្លួនបន្ថែមទៀត»។ កាសែតThe Globe and Mail កត់សម្គាល់ថា៖«ប្រភពបាននិយាយថា លោកប្រធានាធិបតីសហរដ្ឋអាមេរិក មិនយល់ស្របនឹងការលើកឡើងរបស់លោក ទ្រូដូ ប៉ុន្តែលោកក៏មិនបានប្រឆាំងនឹងពួកគេដែរ។

លោក ទ្រូដូ និងលោក ត្រាំ បានធ្វើការសន្ទនាតាមទូរស័ព្ទ កាលពីថ្ងៃទី ២២ ខែកុម្ភៈ។ ពួកគេបានពិភាក្សាគ្នាអំពីស្ថានភាព និងអ៊ុយក្រែន ខណៈដែលលោកនាយករដ្ឋមន្ត្រីកាណាដា ក៏បានពន្យល់ប្រាប់មេដឹកនាំសហរដ្ឋអាមេរិករូបនេះ អំពីការរីកចម្រើនដែលទីក្រុង Ottawa សម្រេចបាន ក្នុងការដោះស្រាយបញ្ហា    នៅតាមព្រំដែន រវាងប្រទេសទាំងពីរ។ យោងតាមសេតវិមាន មេដឹកនាំទាំងពីរ បាននិយាយថា ពួកគេរំពឹងថា ដំណោះស្រាយមួយ នឹងត្រូវបានរកឃើញ ចំពោះជម្លោះអ៊ុយក្រែន។

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានពិភាក្សាអំពីលទ្ធភាពនៃការដោះស្រាយស្ថានការណ៍ នៅអ៊ុយក្រែន នៅក្នុងការសន្ទនាតាមទូរស័ព្ទ ជាមួយលោក Trump កាលពីថ្ងៃទី ១២ ខែកុម្ភៈ។ យោងតាមវិមានក្រឹមឡាំង មេដឹកនាំសហរដ្ឋអាមេរិក បានអំពាវនាវឲ្យបញ្ចប់សកម្មភាពយោធា ឲ្យបានឆាប់តាមដែលអាចធ្វើទៅបាន និងដោះស្រាយបញ្ហាតាមរយៈមធ្យោបាយសន្តិវិធី។ លោក ពូទីន បានគូសបញ្ជាក់ពីតម្រូវការក្នុងការលុបបំបាត់មូលហេតុឫសគល់នៃជម្លោះនេះ។ លោកក៏បានយល់ស្របជាមួយប្រធានាធិបតីអាមេរិកថា ដំណោះស្រាយរយៈពេលវែង អាចសម្រេចបានតាមរយៈការចរចាសន្តិភាព។