កាលពីថ្ងៃអាទិត្យម្សិលមិញ ជនជាតិអ៊ុយក្រែន និងក្រុមសកម្មជន បានជួបជុំគ្នានៅក្នុងទីក្រុងតៃប៉ិ កោះតៃវ៉ាន់ ស្ថិតនៅក្រៅអគារការិយាល័យតំណាងរុស្ស៊ី រយៈពេល ១ថ្ងៃមុនខួប ៣ឆ្នាំនៃការវាយប្រហាររបស់ទីក្រុងម៉ូស្គូលើប្រទេសអ៊ុយក្រែន ។

ក្រុមបាតុករនាំគ្នាកាន់បដាសរសេរពា្យ “ឈរខាងពួកយើង ប្រយុទ្ធដើម្បីសេរីភាព” និងពាក្យ “អ៊ុយក្រែនមិនមែនជាទំនិញ” ហើយពួកគេនាំគ្នាស្រែកពាក្យស្លោកជាភាសាអ៊ុយក្រែន ពេលពួកគេដង្ហែរក្បួនដោយស្ងៀមស្ងាត់រយៈពេល ១ម៉ោង ។

បាតុករតៃវ៉ាន់ម្នាក់ និយាយថា បើប្រៀបធៀបស្ថានភាពរបស់កោះតៃវ៉ាន់ជាមួយអ្វីដែលកំពុងកើតឡើងនៅអ៊ុយក្រែន គាត់គ្មានជំនឿចិត្តថា សហរដ្ឋអាមេរិកស្ថិតក្រោមការដឹកនាំរបស់លោកប្រធានាធិបតី Donald Trumpនឹងផ្តល់ការការពារដល់កោះតៃវ៉ាន់នោះឡើយ បើសិនជាសង្រ្គាមផ្ទុះឡើងនៅលើកោះស្វ័យគ្រប់គ្រងមួយនេះ ។

ប្រភពព័ត៌មានចំនួន ៣បាននិយាយប្រាប់ទីភ្នាក់ងារព័ត៌មានរ៉យទ័រថា នៅថ្ងៃចន្ទនេះ ក្រុមប្រទេសមានឧស្សាហកម្មរីកលូតលាស់ G7គ្រោងនឹងផ្អាកការប្រជុំ នៅខួបលើកទី ៣នៃង្រ្គាមអ៊ុយក្រែន ប៉ុន្តែមកទល់នឹងពេលនេះ សហរដ្ឋអាមេរិកជំទាស់ប្រើភាសា “ការឈ្លានពានរបស់រុស្ស៊ី” ។

សេចក្តីថ្លែងការណ៍ចេញដោយរដ្ឋមន្រ្តី G7 កាលពីសប្តាហ៍មុន ក៏ពុំមានការអះអាងពីការឈ្លានពានរបស់រុស្ស៊ីដូចគ្នា ប៉ុន្តែពួកគេពិតជាបានសំដោះលើ “សង្រ្គាមងើបមុខលែងរួចរបស់រុស្ស៊ីនៅអ៊ុយក្រែន” ។

ខួប ៣ឆ្នាំនៃសង្រ្គាមអ៊ុយក្រែននេះដែរ គាប់ជួននឹងជម្លោះពាក្យសម្តីរវាងប្រធានាធិបតីអ៊ុយក្រែនលោក Volodymyr Zelenskiy និងប្រធានាធិបតីសហរដ្ឋអាមេរិកលោក Donald Trump ដែលបានចាត់ទុកលោក Zelenskiy ថាជាជនផ្តាច់ការ ។

លោក Trump ព្យាយាមបញ្ចប់ឲ្យបានឆាប់សង្រ្គាមនៅអ៊ុយក្រែន និងបានបញ្ជូនក្រុមមន្រ្តីជាន់ខ្ពស់ទៅចូលរួមកិច្ចប្រជុំជាមួយក្រុមមន្រ្តីរុស្ស៊ីកាលពីសប្តាហ៍មុន នៅប្រទេសអារ៉ាប៊ីសាអ៊ូឌីត ដោយគ្មានការជាប់ពាក់ព័ន្ធពីទីក្រុងគីវ ៕