ក្រុមស្តាំនិយមជ្រុល គឺគណបក្សជម្រើសផ្សេងទៀត សម្រាប់អាល្លឺម៉ង់ (AfD) និងក្រុមឆ្វេងនិយម គឺគណបក្ស Left របស់ប្រទេសអាល្លឺម៉ង់ មានអាសនៈរួមគ្នា ១ភាគ៣ នៅក្នុងសភាថ្មី ដោយចំនួននេះបានផ្ដល់ឲ្យពួកគេនូវសិទ្ធិអំណាចគ្រប់គ្រាន់ ក្នុងការរាំរាំងដល់ដំណើរការកែប្រែរដ្ឋធម្មនុញ្ញ ក្នុងនោះរួមទាំងការគ្រប់គ្រងកម្រិតបំណុលរបស់ប្រទេសផងដែរ។

ការគ្រប់គ្រងបំណុល កម្រិតឱនភាពថវិកាដល់ចំនួន ០,៣៥ភាគរយនៃផលិតផលក្នុងស្រុកសរុប (GDP) ទោះបីជាចំនួននោះមិនរាប់បញ្ចូលនូវការបញ្ចូលទឹកប្រាក់នៃមូលនិធិពិសេស សម្រាប់វិស័យការពារជាតិ ឬការបង្កើតមូលនិធិពិសេសថ្មីក៏ដោយ។

តែទោះជាយ៉ាងណាក្ដី ទាំងគណបក្ស AfD និងគណបក្ស Left ជំទាស់នឹងការផ្ដល់ជំនួយយោធាដល់អ៊ុយក្រែន ហើយដោយសិទ្ធិអំណាចថ្មីរបស់ពួកគេ នៅក្នុងសភាជាន់ទាប Bundestag ពួកគេអាចវេតូ ចំពោះការបង្កើនការចំណាយលើមូលនិធិការពារជាតិ ដោយការធ្វើបែបនេះបង្កើតនូវភាពតានតឹងជាមួយសម្ព័ន្ធមិត្តអង្គការណាតូរបស់អាល្លឺម៉ង់ ក្នុងនោះរួមទាំងរដ្ឋបាលរបស់លោក Donald Trump ដែលចង់ឲ្យអឺរ៉ុបចំណាយឲ្យច្រើនបន្ថែមទៀត។

គួរបញ្ជាក់ថា ក្រុមអភិរក្សនិយមអាល្លឺម៉ង់ ក្រោមការដឹកនាំរបស់អ្នកដែលទំនងក្លាយជាអធិការបតីបន្ទាប់ គឺលោក Friedrich Merz នៅថ្ងៃចន្ទ (ទី២៤ ខែកុម្ភៈ) នេះ បានប្តេជ្ញាថា នឹងចាត់វិធានការយ៉ាងឆាប់រហ័ស ដើម្បីព្យាយាមបង្កើតរដ្ឋាភិបាលចម្រុះ បន្ទាប់ពីទទួលបានសំឡេងឆ្នោតច្រើនជាងគេ នៅក្នុងការបោះឆ្នោតជាតិ ប៉ុន្តែការទទួលបានសន្លឹកឆ្នោតរបស់គណបក្ស AfD និងគណបក្សឆ្វេងនិយមជ្រុល នឹងផ្ដល់ភាពស្មុគស្មាញដល់ការងាររបស់លោក៕