បណ្តាប្រទេសសហភាពអឺរ៉ុប (EU) នៅថ្ងៃចន្ទ (ទី២៤ ខែកុមុ្ភៈ) នេះ បានបញ្ឈប់ជាបណ្ដោះអាសន្ននូវការដាក់ទណ្ឌកម្មជាច្រើនលើប្រទេសស៊ីរី ដោយចាប់ផ្ដើមមានប្រសិទ្ធិភាពភ្លាមៗ ក្នុងនោះរួមទាំងផ្អាកការរឹតបន្តឹង ទាក់ទងនឹងវិស័យថាមពល ធនាគារ ការដឹកជញ្ជូន និងការកសាងឡើងវិញផងដែរ។

EU បានដាក់ទណ្ឌកម្មជាច្រើន ដោយកំណត់កំណត់គោលដៅ ទាំងលើផ្នែកបុគ្គល និងសេដ្ឋកិច្ច នៅក្នុងប្រទេសស៊ីរី។ តែបណ្ដាមេដឹកនាំអឺរ៉ុប បានចាប់ផ្តើមពិចារណាឡើងវិញនូវវិធីសាស្រ្តរបស់ពួកគេ បន្ទាប់ពីកងកម្លាំងបះបោរដឹកនាំដោយក្រុមឥស្លាមនិយម Hayat Tahrir al-Sham (HTS) បានទម្លាក់លោក Bashar al-Assad ចេញពីតំណែងជាប្រធានាធិបតី កាលពីខែធ្នូឆ្នាំមុន។

អំឡុងកិច្ចប្រជុំនៅទីក្រុងប្រ៊ុចសែល ប្រទេសបែលហ្ស៊ិក នៅថ្ងៃចន្ទនេះ រដ្ឋមន្ត្រីការបរទេស EU បានយល់ព្រមផ្អាកការរឹតបន្តឹងលើវិស័យថាមពលដែលគ្របដណ្តប់លើប្រេង ឧស្ម័ន និងអគ្គិសនី ហើយនិងបញ្ឈប់ការដាក់ទណ្ឌកម្មលើវិស័យដឹកជញ្ជូន។

ជាមួយគ្នានេះ រដ្ឋមន្ត្រីទាំងនោះ ក៏បានលុបចោលដំណើរការបង្កកទ្រព្យសម្បត្តិ សម្រាប់ធនាគារចំនួន៥ បន្ធូរបន្ថយការរឹតបន្តឹងលើធនាគារកណ្តាលស៊ីរី និងបានពង្រីកបន្ថែមនូវការលើកលែងដោយគ្មានកំណត់ ដើម្បីជួយសម្រួលដល់ការផ្តល់ជំនួយមនុស្សធម៌៕