ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃចន្ទ ទី២៤ ខែកុម្ភៈ ថា ប្រធានាធិបតីរុស្ស៊ី លោក Vladimir Putin បានទទួលយកគំនិតរបស់សហភាពអឺរ៉ុបក្នុងការបញ្ជូនកងរក្សាសន្តិភាពទៅកាន់ប្រទេសអ៊ុយក្រែន ជាផ្នែកនៃកិច្ចព្រមព្រៀងបទឈប់បាញ់ ហើយប្រធានាធិបតីបារាំង លោក Emmanuel Macron បាននិយាយថា សហភាពអឺរ៉ុបត្រៀមខ្លួនជាស្រេចដើម្បីជួយ។

លោក Trump និង លោក Macron បានគូសបញ្ជាក់ពីកិច្ចខិតខំប្រឹងប្រែងដើម្បីចរចាបញ្ចប់សង្រ្គាមអ៊ុយក្រែន នៅក្នុងកិច្ចពិភាក្សា នៅការិយាល័យ Oval Office បន្ទាប់ពីបានចូលរួមក្នុងសន្និសីទតាមវីដេអូ ជាមួយមេដឹកនាំ ប្រទេស G7 ផ្សេងទៀត ដើម្បីប្រារព្ធខួប៣ឆ្នាំ នៃការចាប់ផ្តើមសង្រ្គាមនៅអ៊ុយក្រែន។

លោក Trump បាននិយាយអំពីការទទួលយកកងកម្លាំងរក្សាសន្តិភាពរបស់លោក Putin ថា «ពិតណាស់ លោក Putin នឹងទទួលយករឿងនេះ»។ «ខ្ញុំបានសួរសំនួរនេះយ៉ាងច្បាស់លាស់ដល់លោក Putin។ លោកពុំមានបញ្ហាក្នុងរឿងនេះទេ»។

លោក Macron ជាមេដឹកនាំអឺរ៉ុបដំបូងគេ ដែលបានទៅជួបលោក Trump ចាប់តាំងពីលោកឡើងកាន់តំណែងជាថ្មីកាលពីខែមុន បាននិយាយថា អឺរ៉ុបមានតួនាទីក្នុងការផ្តល់ការធានាសន្តិសុខ។ ជាដំបូង បទឈប់បាញ់ត្រូវតែបានចរចា ហើយក្រោយមក កិច្ចព្រមព្រៀងសន្តិភាពដែលគាំទ្រដោយការធានាបានសន្តិសុខ។

លោក Trump បាននិយាយថា សហរដ្ឋអាមេរិក «ជិតឈានដល់» កិច្ចព្រមព្រៀងរ៉ែ ជាមួយអ៊ុយក្រែន ហើយលោកអាចនឹងជួបជាមួយប្រធានាធិបតីអ៊ុយក្រែន លោក Volodymyr Zelenskyy នៅចុងសប្តាហ៍នេះ ឬសប្តាហ៍ក្រោយ ដើម្បីចុះហត្ថលេខាលើកិច្ចព្រមព្រៀងនេះ។