ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃចន្ទ បានអនុម័តសេចក្តីសម្រេចដែលពង្រៀងដោយសហរដ្ឋអាមេរិកស្តីពីខួប៣ឆ្នាំនៃការវាយលុករបស់រុស្ស៊ីលើអ៊ុយក្រែន ដែលប្រកាន់យកជំហរអព្យាក្រឹតលើជម្លោះនេះ ខណៈប្រធានាធិបតីសហរដ្ឋអាមេរិក លោក Donald Trump ព្យាយាមសម្របសម្រួលសន្តិភាព។

រហូតមកដល់ពេលនេះ ក្រុមប្រឹក្សាដែលមានសមាជិក១៥រូប ពុំអាចមានចំណាត់ការណាមួយលើជម្លោះនៅអ៊ុយក្រែនបាននៅឡើយ ដោយសាររុស្ស៊ីមានអំណាចប្រើប្រាស់សិទ្ធវ៉េតូ។ សេចក្តីសម្រេចរបស់សហរដ្ឋអាមេរិក ទទួលបានសំឡេងឆ្នោតគាំទ្រ១០សំឡេង ខណៈប្រទេសបារាំង អង់គ្លេស ដាណឺម៉ាក ក្រិក និងប្រទេសស្លូវេនី អនុប្បវាទ។

លោកស្រី Dorothy Shea ឯកអគ្គរដ្ឋទូតស្តីទីរបស់សហរដ្ឋអាមេរិកប្រចាំនៅអង្គការសហប្រជាជាតិ បាននិយាយទៅកាន់ក្រុមប្រឹក្សាថា «សេចក្តីសម្រេចនេះ ធ្វើឱ្យយើងដើរលើផ្លូវទៅរកសន្តិភាព។ វាជាជំហានដំបូង ប៉ុន្តែជាជំហានដ៏សំខាន់ ដែលយើងទាំងអស់គ្នានឹងមានមោទនភាព»។ បច្ចុប្បនេះ យើងត្រូវតែប្រើប្រាស់មធ្យោបាយនេះ ដើម្បីកសាងអនាគតសន្តិភាពសម្រាប់ប្រទេសអ៊ុយក្រែន រុស្ស៊ី និងសហគមន៍អន្តរជាតិ។

កិច្ចខិតខំប្រឹងប្រែងសម្របសម្រួលរបស់លោក Trump បានធ្វើឱ្យសម្ព័ន្ធមិត្តសហភាពអឺរ៉ុប និងអ៊ុយក្រែនមានការប្រុងប្រយ័ត្នចំពោះការផ្តោតការយកចិត្តទុកដាក់របស់លោកទៅលើរុស្ស៊ី និងព្រួយបារម្ភថា វាអាចនឹងត្រូវកាត់ចេញពីកិច្ចចរចាសន្តិភាព។