សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា មានប្រទេសជិតខាងខ្លះ​របស់កម្ពុជា បានកំពុងព្យាយាមនិយាយ​បង្ខូច​កេរ្តិ៍​ឈ្មោះរបស់កម្ពុជា ដើម្បី​មិនឲ្យភ្ញៀវទេសចរណ៍ និងអ្នកវិនិយោគបរទេសដទៃទៀតមកទស្សនា និង​ធ្វើការវិនិយោគ​នៅកម្ពុជា។

ក្នុងឱកាសអញ្ជើញជាអធិបតីភាព ក្នុងពិធីប្រគល់សញ្ញាបត្រកម្រិតបរិញ្ញាបត្ររងបរិញ្ញាបត្រ និង​បរិញ្ញាបត្រជាន់ខ្ពស់ ដល់និស្សិតជ័យលាភី នៃសាកលវិទ្យាល័យ Southwest Asia ​នាថ្ងៃទី២៥ ខែកុម្ភៈ ឆ្នាំ២០២៥នេះ នៅខេត្តសៀមរាប ​សម្តេចធិបតី​នាយករដ្ឋមន្រ្តីបានបញ្ជាក់ថា​ ប្រទេសជិត​ខាងកម្ពុជាខ្លះ ​តែងព្យាយាមវាយប្រហារ និង​បង្ខូចកេរ្ដិ៍​ឈ្មោះកម្ពុជា ថាគ្មានសន្តិសុខ សណ្តាប់ធ្នាប់ ដើម្បីឱ្យអន្តរជាតិ ​ភ្ញៀវទេសចរ ​ឬអ្នកវិនិយោគ មានការភាន់ច្រឡំមកលើកម្ពុជា។ ប៉ុន្តែទោះជាពួកគេខិតខំព្យាយាមវាយប្រហារ ​និងនិយាយអាក្រក់ពីកម្ពុជាក្តី ​នៅតែមានបរទេស​ជឿជាក់​លើកម្ពុជាដដែលជាក់ស្តែងដូចជាម៉ាកយីហោគ្រឿងអលង្ការដ៏ល្បីលំដាប់ពិភពលោក BVLGARIជាដើម គឺគេទុកចិត្តកម្ពុជាទើបបានគេមកបង្កើតព្រឹត្តិការណ៍នៅទឹកដីអង្គរដ៏បវរនៃយើង និងព្រឹត្តិការណ៍ជាច្រើនទៀតលំដាប់ពិភពលោក។

ជាមួយគ្នានោះដែរសម្តេចធិបតី នាយករដ្ឋមន្រ្តីក៏បានលើកឡើងពីបងប្អូនខ្មែរមួយចំនួនផងដែរដែល​តែងតែប្រកាស​ និងដេកភ័យខ្លាចថាបាត់បង់ទឹកដីរបស់កម្ពុជា ​ដោយសម្តេច បានចោទជាសំណួរថា តើកម្ពុជាយើងនឹងបាត់ទៅណា? ខណៈប្រជាពលរដ្ឋខ្មែរពីមុនមានមិនដល់ ១០លាននាក់​ផងតែសព្វថ្ងៃមានរហូតដល់១៧លាននាក់នោះ។

សម្តេចធិបតីនាយករដ្ឋមន្រ្តី បានលើកឡើងទៀតថា កម្ពុជាបានឆ្លងកាត់សង្គ្រាមជាច្រើនមកហើយ ដូច្នេះសម្តេចមិនចង់ឃើញការភ័យខ្លាចចំពោះការបង់បាត់ប្រទេសទៅជាការបាក់ទឹកចិត្តនោះឡើយ តែផ្ទុយទៅវិញបើកាន់តែខ្លាច ​គឺត្រូវកាន់តែខំសាង​ភាពជាម្ចាស់ការដោយខ្លួនឯង​ ហើយកុំដេក​តែ​ភ័យខ្លាចពេក ​ត្រូវតែមានមោទនភាពខ្លួនឯង​ ពោលគឺបើខ្លាចគប្បីពង្រឹងខ្លួនឯង ពង្រឹងធនធាន​មនុស្ស ពង្រឹងសមត្ថភាព គុណធម៌ ​សាមគ្គីភាព និងសីលធម៌ជាដើមនោះ៕អត្ថបទ៖ បាន ចក់