បណ្ដាមេដឹកនាំលោកខាងលិចជាច្រើនបានបញ្ជាក់ពីជំហរគាំទ្ររបស់ពួកគេ ខណៈអ៊ុយក្រែន កាលពីថ្ងៃចន្ទ (២៤ កុម្ភៈ) បានប្រារព្ធខួបដ៏ក្រៀមក្រំបំផុតនៃសង្រ្គាមរបស់ខ្លួនទល់នឹងរុស្ស៊ី ក្នុងពេលដែលកងកម្លាំងទីក្រុងគីវ ស្ថិតនៅក្រោមសម្ពាធយ៉ាងធ្ងន់ធ្ងរលើសមរភូមិ និងការងាករេយ៉ាងជាក់ស្តែងរបស់រដ្ឋបាលលោកប្រធានាធិបតីអាមេរិក Donald Trump ទៅរកវិមានក្រឹមឡាំង ក្នុងការបញ្ច្រាសគោលនយោបាយអាមេរិក។

ព្រឹត្តិការណ៍សំខាន់រយៈពេលបីឆ្នាំនេះ បានទាក់ទាញមេដឹកនាំលោកខាងលិចជាច្រើនទៅកាន់ទីក្រុងគីវ ក្នុងការបង្ហាញការគាំទ្រដ៏លេចធ្លោរបស់ខ្លួន។ ពួកគេបានព្រមានពីផលប៉ះពាល់កាន់តែទូលំទូលាយនៃសង្រ្គាមសម្រាប់សន្តិសុខពិភពលោក ហើយបានប្តេជ្ញាបន្តផ្តល់ជំនួយរាប់ពាន់លានដុល្លារដល់អ៊ុយក្រែន ខណៈភាពមិនច្បាស់លាស់កាន់តែស៊ីជម្រៅលើការប្តេជ្ញាចិត្តរបស់អាមេរិក។ ទីក្រុងវ៉ាស៊ីនតោន មិនបានបញ្ជូនមន្ត្រីជាន់ខ្ពស់ណាម្នាក់ទៅចូលរួមពិធីនោះទេ។

មេដឹកនាំទាំងនោះបានគោរពវិញ្ញាណក្ខន្ធទាហានអ៊ុយក្រែនដែលស្លាប់ក្នុងសង្រ្គាម ដោយឈរស្ងៀមស្ងាត់នៅចំពោះមុខទីគោរពវិញ្ញាណក្ខន្ធ ដែលមានទង់ជាតិ និងរូបថតជាច្រើននៅទីលានចតុរង្គកណ្តាលក្រុងគីវ។

ឆ្នាំទី៤ នៃជម្លោះនេះអាចជាចំណុចសំខាន់ នៅពេលដែលលោក Trump ប្រើការវិលត្រឡប់របស់លោកទៅកាន់តំណែងសេតវិមាន ដើម្បីជំរុញសន្តិភាព ដោយក្រុមមន្ត្រីអាមេរិកបានបើកកិច្ចពិភាក្សាដោយផ្ទាល់ជាមួយភាគីរុស្ស៊ី ក្នុងប្រទេសអារ៉ាប៊ីសាអ៊ូឌីត កាលពីសប្តាហ៍មុន ដោយមិនរួមបញ្ជូលទីក្រុងគីវ និងអឺរ៉ុបនោះឡើយ ៕