ប្រធានាធិបតីអ៊ុយក្រែន លោក Volodymyr Zelenskiy កាលពីថ្ងៃចន្ទ (ទី២៤ ខែកុម្ភៈ) បាននិយាយថា ប្រទេសរបស់លោក និងសហរដ្ឋអាមេរិក កំពុងធ្វើការប្រកបដោយផលិតភាព ជុំវិញកិច្ចព្រមព្រៀងសេដ្ឋកិច្ច ដែលជាផ្នែកដ៏សំខាន់នៃកិច្ចប្រឹងប្រែង ដើម្បីបញ្ចប់សង្គ្រាមរបស់រុស្ស៊ី នៅអ៊ុយក្រែន។

លោក Zelenskiy បានធ្វើការកត់សម្គាល់បែបនេះ ពីទីក្រុងគីវ ក្នុងអំឡុងពេលសុន្ទរកថាតាមរយៈវីដេអូតំណភ្ជាប់ទៅកាន់មេដឹកនាំប្រទេសមានឧស្សាហកម្មឈានមុខគេទាំង៧ (G7) ក្នុងនោះមានរួមទាំងប្រធានាធិបតីអាមេរិក លោក Donald Trump ផងដែរ ជាពេលដែលលោកបានលើកឡើងជាថ្មីម្តងទៀតថា ទាំងអឺរ៉ុប និងអ៊ុយក្រែន គួរតែចូលរួមក្នុងដំណើរការសន្តិភាព។

អ៊ុយក្រែនធ្វើជាម្ចាស់ផ្ទះទទួលមេដឹកនាំអឺរ៉ុប កាលពីថ្ងៃចន្ទ ដើម្បីប្រារព្ធខួប ៣ឆ្នាំនៃសង្រ្គាមពេញបន្ទុកជាមួយរុស្ស៊ី ខណៈដែលបណ្ដាមន្ត្រីជាន់ខ្ពស់របស់សហរដ្ឋអាមេរិក បានបាត់វត្តមាន សម្រាប់ព្រឹត្តិការណ៍នេះ ជាការបង្ហាញរូបភាពយ៉ាងច្បាស់លាស់នៃទំនោររបស់លោកប្រធានាធិបតី Donald Trump ដែលផ្អៀងឆ្ពោះទៅរកទីក្រុងមូស្គូ ចាប់តាំងពីបានវិលត្រលប់មកកាន់អំណាច។

ដោយនៅមិនទាន់រលប់បាត់នូវសម្ដីដែលលោក Trump បរិហារលោក Zelenskiy ថា ជា «ជនផ្តាច់ការ» និងចោទប្រកាន់រូបលោកថា ជាអ្នកបង្កឲ្យមានសង្រ្គាម ឥឡូវនេះ ទីក្រុងគីវ បានប្រាប់ថា ការចរចាកំពុងស្ថិតនៅក្នុងដំណាក់កាលចុងក្រោយ ជុំវិញការយល់ព្រមលើកិច្ចព្រមព្រៀង ដើម្បីផ្តល់លទ្ធភាពឲ្យទីក្រុងវ៉ាស៊ីនតោនទទួលបានធានធានរ៉ែរបស់ខ្លួន៕