ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ ពិធីប្រគល់សញ្ញាបត្រដល់និស្សិតជ័យលាភី នៃសាកលវិទ្យាល័យ Southwest Asia នៅសណ្ឋាគារសុខាសៀមរាប នៅព្រឹកថ្ងៃទី២៥ ខែកុម្ភៈ ឆ្នាំ២០២៥នេះដែរ សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានផ្ដល់នូវអនុសាសន៍លើការអនុវត្តការងាររបស់សម្ដេចទៅដល់យុវជន និងនិស្សិត នៅពេលអនុវត្តការងារ គឺត្រូវធ្វើឱ្យលឿន ធ្វើឱ្យលះ បើស្ទះ សុំគោលការណ៍ ពីថ្នាក់ដឹកនាំរបស់ខ្លួន។

ក្នុងឱកាសនោះសម្ដេចធិបតី នាយករដ្ឋមន្រ្ដី ផ្ដល់អនុសាសន៍ដល់និស្សិត ក្នុងពេលប្រកបការងារ គឺតម្រូវការដែលនិស្សិតជួប និងបទពិសោធន៍ដែលជួបគឺទាមទារឱ្យដោះស្រាយ និងប្រឈមមុខចំពោះកិច្ចការងារទាំងនោះ។ ទន្ទឹមនឹងការកសាងសមត្ថភាព គឺត្រូវមានផ្នត់គំនិតវិជ្ជមានដើម្បីឈានទៅទទួលបានជោគជ័យ ជាពិសេសត្រូវព្យាយាមដោះស្រាយបញ្ហាដែលជួបប្រទះឱ្យបាន។

សម្ដេចធិបតីមានប្រសាសន៍ថា សព្វថ្ងៃបើគិតពីសម្ដីក្រុមប្រឆាំងជ្រុលនិយមដែលជេរប្រមាថមកសម្ដេចសម្ដេចបៀបបាននឹងហូបអាហារបីពេល ព្រឹក ថ្ងៃត្រង់ និងល្ងាច ប៉ុន្ដែសម្ដេចមិនដែលខ្វល់នឹងសម្ដីទាំងនោះទេ ប៉ុន្ដែបែរមកគិតគូរលើការដោះស្រាយបញ្ហាជូនដល់ប្រជាពលរដ្ឋ និងគិតគូរថាធ្វើយ៉ាងណាឱ្យប្រជាពលរដ្ឋរស់នៅមានក្ដីសុខ មានជីវភាពធូរធារ ប្រទេសជាតិមានការអភិវឌ្ឍទៅវិញ។

សម្ដេចធិបតី នាយករដ្ឋមន្រ្ដីបានចែករំលែកបទពិសោធន៍របស់សម្ដេចផ្ទាល់ថា នៅពេលសម្ដេចប្រគល់ការងារដល់មន្រ្ដីសម្ដេចបានដាក់គោលការណ៍ឱ្យធ្វើ គឺធ្វើឱ្យលឿន ធ្វើឱ្យលះ បើស្ទះ សុំគោលការណ៍ ដែលគោលការណ៍នេះបានផ្ដល់ប្រសិទ្ធភាពខ្លាំងណាស់ចំពោះការអនុវត្តកិច្ចការងារផ្សេងៗ។

សូមជម្រាបថា រាជរដ្ឋាភិបាលចាត់ទុកធនធានមនុស្សប្រកបដោយបំណិននាសតវត្សរ៍ទី២១ ជាពិសេស ផ្នែកវិទ្យាសាស្រ្ត បច្ចេកវិទ្យា និង នវានុវត្តន៍ គឺជាកត្តាជំរុញឧត្ដមភាពប្រកួតប្រជែងរបស់ប្រទេសជាតិ។ សមត្ថភាពជំនាញទាំងនេះ ជួយឱ្យប្រជាជនបង្កើតចំណេះដឹងថ្មីៗ និងប្រែក្លាយចំណេះដឹងទាំងនេះទៅជាការអនុវត្តប្រកបដោយនវានុវត្តន៍ ដើម្បីគាំទ្រដល់ការធ្វើអន្តរកម្មសេដ្ឋកិច្ចរបស់ប្រទេសពីការធ្វើពាណិជ្ជកម្មជាលក្ខណៈដោះដូរទំនិញទៅជាការធ្វើពាណិជ្ជកម្មផលិតផល និងសេវាកម្ម ដែលប្រើប្រាស់ចំណេះដឹង និង បច្ចេកវិទ្យាកម្រិតខ្ពស់។ រាជរដ្ឋាភិបាលនៅតែបន្តកំណត់លំដាប់វិស័យអាទិភាព ក្នុងយុទ្ធសាស្រ្តបញ្ចកោណ-ដំណាក់កាលទី១ ដោយកំណត់យក «មនុស្ស» ជាអាទិភាពទី១ ហើយ «ផ្លូវ ភ្លើង ទឹក និង បច្ចេកវិទ្យា» ជាអាទិភាពបន្តបន្ទាប់ និងបានកំណត់យក «ការអភិវឌ្ឍធនធានមនុស្ស» ជាបញ្ចកោណទី១ ក្នុងចំណោមបញ្ចកោណទាំង៥៕អត្ថបទ៖ វ៉ន ដារ៉ា