បាល់ទាត់៖ ក្លិបភ្នំពេញក្រោនបានក្លាយជាម្ចាស់ជើងឯកបាល់ទាត់ជាតិកម្ពុជា២០២១ (មិត្តហ្វូនខាំបូឌានលីគ) ក្រោយឈ្នះក្លិបបឹងកេត ១ទល់នឹង០ នៅកីឡដ្ឋាន RSN កាលពីថ្ងៃសុក្រសប្ដាហ៍មុន។
នេះជាពានលីគលើកទី១ របស់ភ្នំពេញក្រោនតាំងតែពីឆ្នាំ២០១៥ និងជាលើកទី៧ ក្នុងប្រវត្តិបាល់ទាត់លីគកំពូលកម្ពុជា។ នៅពីមុខអ្នកគាំទ្រជាង ២០០០នាក់ តង់ទី១ ក្រុមទាំងពីរស្មើគ្នា ០ទល់នឹង០។ ប៉ុន្តែនាទីទី៧៣ នៃតង់ទី២ កីឡាករសញ្ជាតិជប៉ុន Yudai Okawa ស៊ុតគ្រាប់ជ័យជំនះឱ្យភ្នំពេញក្រោនលើកពាន។ ក្រោយចប់ការប្រកួតលោក កែវ សុខងន អ្នកចាត់ការក្រុមភ្នំពេញក្រោនបានសម្ដែងក្តីរីករាយ ហើយបានបង្ហាញអារម្មណ៍ដែលមិនគួរឱ្យជឿពេលខ្លួនជាកីឡាករធ្លាប់លើកពាន ហើយបានលើកពានម្តងទៀតក្នុងនាមជាអ្នកចាត់ការ។ ចំនែកកីឡាករ លឹម ពិសុទ្ធ ដែលជាកីឡាករក្មេងជាងគេក្នុងក្រុម និង អន ចាន់ប៉ូលីន ដែលជាប្រធានក្រុមបានលើកឡើងពីអារម្មណ៍រីករាយពេលក្លិបរបស់ខ្លួនក្លាយជាជើងឯក។
ក្នុងនាមជាជើងឯកភ្នំពេញក្រោនទទូលបានប្រាក់រង្វាន់ ១៥០លានរៀល និងបានកៅអីទៅលេងពានរង្វាន់ទ្វីបអាស៊ីលំដាប់ទី២ AFC Cup វគ្គចែកពូល។ សូមជម្រាបជូនថា ៦លើកដែលភ្នំពេញក្រោនក្លាយជាម្ចាស់ជើងឯកគឺក្នុងឆ្នាំ២០០២ ពេលនោះមានឈ្មោះសាម៉ាតយូណាយធីតឆ្នាំ២០០៨ ២០១០ ២០១១ ២០១៤ និង២០១៥ ហើយឆ្នាំនេះលើកពានបន្ទាប់ពី ១៩ប្រកួតចាញ់តែមួយប្រកួតទេ ឈ្នះ ១៣ប្រកួត និងស្មើ ៥ប្រកួត៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
