ឧត្តមសេនីយ៍ឯក លី សុវណ្ណ អគ្គនាយករង នៃអគ្គនាយកដ្ឋានភស្តុភារ ហិរញ្ញវត្ថុ និងជា​នាយក​មន្ទី​រពេទ្យ ព្រះកេតុមាលា បានប្រកាសថា រាល់ការព្យាបាល និងពិនិត្យ អេកូសាស្រ្ត ថតរស្មីអ៊ិច ជំងឺទូទៅដល់យោធិនទាំងពីររូបគឺនឹងមិនតម្រូវឲ្យគិតកម្រៃជាដាច់ខាត លើកលែងតែជំងឺធ្ងន់ធ្ងរហើយមានការខ្វះខាតឈាមអ្វីជាដើមនោះទើបតម្រូវឲ្យមានការចូលរួមសហការជាមួយក្រុមគ្រួសារអ្នកជំងឺ។

បើតាមការលើកឡើងរបស់ឧត្តមសេនីយ៍ឯក លី សុវណ្ណ បានឲ្យដឹងថាមន្ទីរពេទ្យព្រះកេតុមាលា ជាអង្គភាពមួយស្ថិតនៅក្នុងចំណុះឲ្យអគ្គនាយកដ្ឋានភស្តុភារ ហិរញ្ញវត្ថុ ក្រសួងការពារជាតិដែលមុនឆ្នំា២០២៤នោះរួមមាននាយឧត្តមសេនីយ៍ ស៊ុំ សំណាង ជាអគ្គនាយក នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ និងសម្តេចពិជ័យសេនាទៀ បាញ់ រដ្ឋមន្រ្តីក្រសួងការពារជាតិជាអ្នកមើលបន្ថែម ប៉ុន្តែបន្ទាប់ពីឆ្នាំ២០២៤ មានការផ្លាស់ប្តូរដោយឧត្តមសេនីយ៍ឯក ម៉ឹង ពន្លកជាអគ្គនាយក អគ្គនាយ ដ្ឋានភស្តុភារ ហិរញ្ញវត្ថុក្រសួងការពារជាតិវិញ ហើយនាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិជាអ្នកគ្រប់គ្រងនៅពីលើ។

បើតាមឧត្តមសេនីយ៍ឯក លី សុវណ្ណ បានលើកឡើងទៀតថា ការគ្រប់គ្រងរបស់ថ្នាក់ដឹកនាំជំនាន់ មុន បានធ្វើឲ្យមន្ទីរពេទ្យព្រះកេតុមាលាមានការអភិវឌ្ឍជាបន្តបន្ទាប់ លើផ្នែកធនធានមនុស្ស ការសាងសង់ អាគារព្យាបាល និងបំពាក់ឧបករណ៍សម្ភារៈទំនើបៗជាច្រើន ហើយក្នុងឆ្នាំ២០២៤នេះ ឯកឧត្តម ម៉ឹង ពន្លក ក៏ដូចជានាយឧត្តមសេនីយ៍ ទៀ សីហា បានផ្តល់អនុសាសន៍ ដើម្បីជំរុញការអភិវឌ្ឍមន្ទីរពេទ្យព្រះ កេតុមាលា ឲ្យកាន់តែល្អប្រសើរបន្ថែមទៀត ដោយបានធ្វើនូវសហប្រតិបត្តិការរវាងមន្ទីរពេទ្យព្រះកេតុមាលា ជាមួយមន្ទីរពេទ្យយោធា១៧៥ កងទ័ពប្រជាជនវៀតណាម និងជាមួយសកលវិទ្យាល័យវិទ្យាសាស្រ្ត សុខាភិបាលកងទ័ពជើងទឹកកងទ័ពរំដោះប្រជាជនចិននៅសៀងហៃ។

 ឯកឧត្តមនាយកមន្ទីរពេទ្យបានបន្ថែមទៀតថា«ចំពោះភារកិច្ចសង្រ្គោះព្យាបាលយោធិនទាំងពីរ ភេទ ដោយឈរលើគោលនយោបាយមិនយកកម្រៃព្យាបាលនិងសេវាផ្សេងៗ ដូចជាការមកពិនិត្យជំងឺ ថត អេកូសាស្រ្ត ថតកម្មរស្មីអ៊ិច ស៊ីធីស្កែន ព្យាបាលជំងឺគ្រប់ប្រភេទមួយចំនួន ឬពិនិត្យសុខភាពសិក្សាកាមទៅ រៀននៅបរទេស និងកងទ័ពដែលទៅចូលរួមរក្សាសន្តិភាពក្រោមឆត្រអង្គការសហប្រជាជាតិជាដើមនោះ គឺមន្ទីរពេទ្យមិនបានគិតកម្រៃអ្វីនោះឡើយ ដោយឡែកជំងឺបេះដូងធ្ងន់ធ្ងរ វះកាត់តសរសៃឈាមបេះដូង ដូរ ប្រេសបេះដូង វះកាត់ខួរក្បាល វះកាត់ឆ្អឹងខ្នង ជំងឺខ្សោយតម្រងនោមដែលត្រូវលាងឈាម ជំងឺសង្រ្គោះ ICUនោះនៅមន្ទីរពេទ្យមានការខ្វះខាតឈាម ខ្វះខាតសារ៉ូមជាតិសាច់ ខ្វះខាតសម្ភារៈនោះ គឺមានការ ចូលរួមពីសំណាក់ក្រុមគ្រួសារដើម្បីជួយមន្ទីរពេទ្យក្នុងការជួយសង្រ្គោះព្យាបាលជំងឺឲ្យទាន់ពេលវេលា»។

បើតាមក្រសួងសុខាភិបាល ក៏បានណែនាំដល់អង្គភាពផ្តល់សេវាសុខាភិបាលសាធារណៈទាំងអស់ ទាំងថ្នាក់ជាតិ និងថ្នាក់ក្រោមជាតិ ឲ្យមានការយកចិត្តទុកដាក់ខ្ពស់ចំពោះយោធិនអាជីព អតីតយោធិនអាជីព អតីតនាយទាហានថ្នាក់ឧត្តមសេនីយ៍ និងឧត្តមនាវី នៅពេលមានជំងឺ ដោយមិនត្រូវគិតកម្រៃផងដែរ ដោយថ្លៃសេវានៃការពិនិត្យព្យាបាលជាបន្ទុករបស់រដ្ឋ ដែលស្ថិតក្រោមការចំណាយរបស់អង្គភាពសុខាភិបាលសាធារណៈ៕ អត្ថបទ៖ បាន ចក់