យោងតាមសេចក្តីថ្លែងការណ៍ដែលបានចេញផ្សាយកាលពីល្ងាចថ្ងៃចន្ទបានឲ្យដឹងថា អតីតមេដឹកនាំអាហ្រ្វិកបីរូប ត្រូវបានតែងតាំងជាអ្នកសម្របសម្រួលនៃយន្តការសម្របសម្រួលប្រចាំតំបន់ចុងក្រោយ ដែលត្រូវបានសម្របសម្រួលដោយប្លុកក្នុងតំបន់ចំនួនពីរ ជុំវិញវិបត្តិសន្តិសុខនៅភាគខាងកើតសាធារណរដ្ឋប្រជាធិបតេយ្យកុងហ្គោ (DRC)។

សហគមន៍អាហ្វ្រិកខាងកើត (EAC) និងសហគមន៍អភិវឌ្ឍន៍អាហ្វ្រិកខាងត្បូង (SADC) បានប្រកាសរួមគ្នាថា ពួកគេបានតែងតាំងអតីតប្រធានាធិបតីកេនយ៉ាលោក Uhuru Kenyatta អតីតប្រធានាធិបតីប្រទេសនីហ្សេរីយ៉ាលោក Olusegun Obasanjo និងអតីតនាយករដ្ឋមន្ត្រីអេត្យូពី លោក Hailemariam Desalegn ជាអ្នកសម្របសម្រួលនៃដំណើរការសន្តិភាពរួមគ្នា នៅប្រទេសកុងហ្គោ។

ប្លុកប្រចាំតំបន់ទាំងពីរក៏បានប្រកាសអំពីកិច្ចប្រជុំថ្នាក់រដ្ឋមន្ត្រីដែលគ្រោងនឹងធ្វើនៅថ្ងៃទី២៨ ខែកុម្ភៈ ខណៈអំពាវនាវដល់ចលនាក្រុមM23 ជាក្រុមឧទ្ទាមដែលបានដណ្តើមយកទីក្រុងធំៗជាច្រើននៅកុងហ្គោ ឲ្យបញ្ឈប់ការរុលចូលទៅមុខបន្ថែមទៀត និងគោរពបទឈប់បាញ់បន្ទាន់។

ក្រុមឧទ្ទាម M23 បានដណ្តើមយកទីក្រុង និងទីប្រជុំជនជាច្រើន រួមទាំងទីក្រុង Goma និងទីក្រុង Bukavu ជាទីរួមខេត្ត North Kivu និងខេត្ត South Kivu ។