ការស្វែងរកយន្តហោះ MH370 របស់ក្រុមហ៊ុនអាកាសចរណ៍ម៉ាឡេស៊ី ដែលជួបជោគវាសនាមិនល្អ បានចាប់ផ្តើមជាថ្មីនៅលើមហាសមុទ្រឥណ្ឌា ដោយនោះទំនងជាការប៉ុនប៉ងចុងក្រោយក្នុងការស្វែងរកយន្តហោះដែលបានបាត់ខ្លួនកាលពី ១១ឆ្នាំមុននេះ។

ប្រព័ន្ធផ្សព្វផ្សាយអូស្ត្រាលី និងអង់គ្លេសបានរាយការណ៍នៅថ្ងៃអង្គារ (២៥ កុម្ភៈ) នេះថា ក្រុមហ៊ុនរុករកតាមសមុទ្រឯកជន ដែលមានមូលដ្ឋាននៅអាមេរិក និងចក្រភពអង់គ្លេស ឈ្មោះថា Ocean Infinity បានទៅដល់តំបន់ស្វែងរកថ្មី ដែលមានចម្ងាយប្រហែល ១.៥០០គីឡូម៉ែត្រ ពីឆ្នេរសមុទ្រនៃទីក្រុង Perth របស់អូស្រ្តាលី កាលពីចុងសប្តាហ៍កន្លងទៅ។

សារព័ត៌មានរាយការណ៍ថា យានក្រោមទឹកស្វ័យប្រវត្តិត្រូវដាក់ពង្រាយពីនាវាស្វែងរក ក្នុងពេលប៉ុន្មានម៉ោងបន្ទាប់ពីទៅដល់ ហើយចាប់ផ្តើមស្កែនលម្អិតលើបាតសមុទ្រដើម្បីរកបំណែកយន្តហោះ MH370 ដែលអាចមាននៅទីនោះ ខណៈនឹងត្រូវស្វែងរកនៅក្នុងតំបន់ ១៥.០០០គីឡូម៉ែត្រក្រឡា សម្រាប់ពេល ៦សប្តាហ៍ ដែលនឹង "យកចិត្តទុកដាក់បន្ថែមលើចំណុចចំនួនបួន" ជាទីដែលអ្នកស្រាវជ្រាវមួយចំនួនគិតថា ប្រហែលមានបំណែកយន្តហោះប្រភេទ Boeing 777 នោះ។

គួររម្លឹកថា នៅថ្ងៃទី០៨ ខែមីនា ឆ្នាំ២០១៤ ជើងហោះហើរនេះបានហោះចេញពីទីក្រុងកូឡាឡាំពួរ ទៅកាន់ទីក្រុងប៉េកាំង ដោយដឹកអ្នកដំណើរចំនួន ២២៧នាក់ និងបុគ្គលិក ១២នាក់ ប៉ុន្តែក្រោយមក យន្តហោះនោះបានបាត់ខ្លួន ហើយរកមិនឃើញឡើយ ខណៈការស្វែងរកកន្លងមកបានបរាជ័យ៕