លោកជំទាវបណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ ទទួលជួបឯកឧត្តម Vanlalvawna Bawitlung ឯកអគ្គរដ្ឋទូតឥណ្ឌាថ្មី ប្រចាំព្រះរាជាណាចក្រកម្ពុជា ដើម្បីសម្តែងការគួរសម និងពិភាក្សាការងារលើវិស័យវប្បធម៌, នាព្រឹកថ្ងៃទី២៥ ខែកុម្ភះ ឆ្នាំ២០២៥នេះ នាទីសី្តការក្រសួង។

ជាកិច្ចចាប់ផ្តើមលោកជំទាវបណ្ឌិតសភាចារ្យ រដ្ឋមន្រី្ត សូមស្វាគមន៍យ៉ាងកក់ក្តៅចំពោះឯកឧត្តម Vanlalvawna Bawitlung ឯកអគ្គរដ្ឋទូតឥណ្ឌាថ្មី ប្រចាំព្រះរាជាណាចក្រកម្ពុជា ដែលមានសុច្ឆន្ទះ មានបំណងចូលរួមគាំទ្រលើវិស័យវប្បធម៌នៃព្រះរាជាណាចក្រកម្ពុជា។ ជាមួយគ្នានេះ លោកជំទាវបណ្ឌិតសភាចារ្យ បានរំលឹកឡើងវិញថា កម្ពុជា ឥណ្ឌា មានកិច្ចសហប្រតិបតិ្តការជាច្រើននាពេលកន្លងមក។ ជាក់ស្តែងឥណ្ឌា គឺជាសហប្រធានរបស់ICC ប្រាសាទព្រះវិហារ (គណៈកម្មាធិការសម្របសម្រួលអន្តរជាតិសម្រាប់ប្រាសាទព្រះវិហារ ហៅកាត់ថា ICC-Preah Vihear) ហើយគណៈកម្មាធិការសម្របសម្រួលអន្តរជាតិសម្រាប់ប្រាសាទព្រះវិហារ បានបង្កើតឡើងនៅឆ្នាំ២០១៤ ដោយមានសាធារណរដ្ឋប្រជាមានិតចិន និងឥណ្ឌា ជាសហប្រធាន។

ទន្ទឹមគ្នានោះដែរ ឯកឧត្តម Vanlalvawna Bawitlung បានលើកឡើងថា កម្ពុជា ឥណ្ឌា ពិតជាមានទំនាក់ទំនង និងកិច្ចសហប្រតិបតិ្តការជាមួយគ្នាច្រើនលើវិស័យវប្បធម៌ ទាំងសម្បតិ្តបេតិកភណ្ឌវប្បធម៌រូបី និងអរូបី។ នាពេលខាងមុខនេះ ឥណ្ឌា-កម្ពុជា និងធ្វើកិច្ចសហប្រតិបតិ្តការជាមួយគ្នាបន្ថែមទៀត មានដូចជា៖ ពិធីបុណ្យម្ហូបអាហារ ដែលព្រឹតិ្តការណ៍មួយនេះ ប្រារព្ធឡើងតាមបណ្តាប្រទេសសមាជិក ដែលមានកិច្ចសហប្រតិបតិ្តការមេគង្គ-គង្គា ដូចជា៖ ប្រទេសកម្ពុជា ឥណ្ឌា មីយ៉ាន់ម៉ា ថៃ ឡាវ និងវៀតណាម ជាដើម។ ក្រៅពីនេះ ឯកឧត្តម ឯកអគ្គរដ្ឋទូតឥណ្ឌាថ្មី ក៏សុំឲ្យមានការជម្រុញកិច្ចសហប្រតិបតិ្តការជាមួយគ្នា ដោយចុះអនុស្សារណៈការយោគយល់គ្នា (MOU) ផ្សេងៗបន្ថែមទៀតឲ្យបានកាន់តែច្រើនលើវិស័យវប្បធម៌។ កន្លងឯកឧត្តម សង្កេតឃើញថា មានក្រុមសិល្បករ សិល្បការិនី ក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា បានអញ្ជើញទៅកាន់ប្រទេសឥណ្ឌា និងចូលរួមសម្តែងក្នុងព្រឹតិ្តការណ៍ផ្លាស់ប្តូរវប្បធម៌ ឥណ្ឌា-កម្ពុជា ដែលជាការផ្សព្វផ្សាយមួយ រវាងប្រជាជន និងប្រជាជន និងជាចំនុចមួយដ៏សំខាន់ ដើម្បីឲ្យប្រជាជននៃប្រទេសទាំងពីរ បានយល់ដឹងពីវប្បធម៌របស់គ្នាទៅវិញទៅមក៕

អត្ថបទ រដ្ឋា