ទីភ្នាក់ងារសារព័ត៌មាន Interfax-Ukraine បានរាយការណ៍ថា ប្រធានគណៈកម្មការអឺរ៉ុប លោកស្រី Ursula von der Leyen បានប្រកាសកាលពីថ្ងៃចន្ទថា សហភាពអឺរ៉ុប នឹងផ្តល់ជំនួយដល់អ៊ុយក្រែនចំនួន៣,៥ ពាន់លានអឺរ៉ូ (៣,៦៧ ពាន់លានដុល្លារ) ដែលនឹងចាប់ផ្តើមនៅខែក្រោយ។

លោកស្រី von der Leyen បាននិយាយក្នុងអំឡុងដំណើរទស្សនកិច្ចរបស់លោកស្រី ទៅកាន់ទីក្រុងគីវ ថា៖«ខ្ញុំអាចប្រកាសថា ជំនួយថ្មីចំនួន ៣,៥ ពាន់លានអឺរ៉ូសម្រាប់អ៊ុយក្រែន នឹងមកដល់នៅក្នុងខែមីនា»។

លោកស្រីបានគូសបញ្ជាក់ថា ដោយសារមូលនិធិអ៊ុយក្រែន និងប្រាក់កម្ចីពីក្រុមប្រទេស G7 គម្រោងចំណាយថវិការបស់អ៊ុយក្រែនសម្រាប់ឆ្នាំ ២០២៥ទាំងមូល ត្រូវបានផ្តល់ឲ្យយ៉ាងពេញលេញ។

លោកស្រី Von der Leyen ក៏បានបង្ហាញកញ្ចប់សុវត្ថិភាពថាមពល ដែលមានគោលបំណងធានានូវប្រព័ន្ធថាមពលដែលធន់ សុវត្ថិភាព និងចំណាយថវិកាតិចសម្រាប់អ៊ុយក្រែន។

ជាផ្នែកនៃការគាំទ្ររយៈពេលវែងរបស់សហភាពអឺរ៉ុប ផែនការនេះ រួមបញ្ចូលទាំងការដាក់បញ្ចូលទីផ្សារ    អគ្គិសនីរបស់អ៊ុយក្រែនយ៉ាងពេញលេញ ទៅក្នុងប្រព័ន្ធអ៊ឺរ៉ុប នៅឆ្នាំ ២០២៧ និងការបន្តបញ្ចូលអ៊ុយក្រែនទៅក្នុងវិស័យឧស្ម័នរបស់សហភាពអឺរ៉ុប។

លើសពីនេះ លោកស្រីបានបញ្ជាក់ថា សហភាពអឺរ៉ុប នឹងធ្វើការពន្លឿនការបញ្ជូនអាវុធ និងគ្រាប់រំសេវ ដល់អ៊ុយក្រែន ក្នុងប៉ុន្មានសប្តាហ៍ខាងមុខ។