​ប៉ូឡូញ៖ មនុស្ស​រាប់​សិប​នាក់​បាន​ប្រមូល​ផ្តុំ​គ្នា​នៅ​ទីក្រុង Hajnówka ភាគ​ខាងកើត​ប្រទេស​ប៉ូឡូញ ដើម្បី​បង្ហាញ​ពី​សាមគ្គីភាព​ដល់​ក្រុម​ជនអន្តោប្រវេសន៍​ដែល​ជាប់​គាំង​នៅ​ព្រំដែន​បេឡា​រុស​។​ ​ប្រទេស​ប៉ូឡូញ​បាន​ចោទប្រកាន់​ប្រទេស​បេឡា​រុស​ថា ​បាន​បន្ត​បញ្ជូន​ក្រុម​ជនអន្តោប្រវេសន៍​តាម​នា​វាទៅកាន់​ព្រំដែន​របស់​ខ្លួន បើ​ទោះ​បី​ជា​មានការ​បោសសម្អាត​ជំរំ​នៅ​ជិត​ព្រំដែន​កាលពីដើម​សប្ដាហ៍​នេះ​ក៏ដោយ ខណៈ​ដែល​នាយករដ្ឋមន្ត្រី​របស់​ប្រទេស​នេះបាន​ចាប់ផ្ដើមធ្វើ​ដំណើរ ​ទៅកាន់​រដ្ឋ​នានា​នៅ​តំបន់​បាល់​ទិក​ដើម្បី​ស្វែងរក​ការ​គាំទ្រ​ក្នុង​ការ​ដោះស្រាយ​វិបត្តិ​នេះ​។​

​ក្រុម​អ្នក​តវ៉ា​ចង់​ឱ្យ​រដ្ឋាភិបាល​ប៉ូឡូញ​អនុញ្ញាត​ឱ្យ​អង្គការក្រៅរដ្ឋាភិបាល​ធ្វើការ​ដោយ​សេរី និង​ជួយ​ក្រុម​ជនអន្តោប្រវេសន៍​។​ ​ក្នុងចំណោមអ្នក​តវ៉ា​ទាំងនោះលោកស្រី Kaja Jasienko ជា​មេធាវី​មកពី​ទីក្រុង Wroclaw​ ប្រទេស​ប៉ូឡូញបាន​និយាយ​ថា ​អ្វី​ដែល​យើង​ទាមទារ​នៅ​ពេលនេះ​ពី​រដ្ឋាភិបាល​ប៉ូឡូញ​គឺ - សូម​បើក​ច្រក​របៀង​អនុញ្ញាត​ឱ្យ​អង្គការ​មនុស្សធម៌ អនុញ្ញាត​ឱ្យ​អង្គការ​វេជ្ជសាស្ត្រនានាចូល​ទៅ​ក្នុង​ព្រៃ ចូល​ទៅ​ក្នុង​តំបន់​បិទ​ជិត។​ ​អ្នកស្ម័គ្រចិត្ត​ម្នាក់ទៀត​មកពី​ទីក្រុង Warsaw អ្នកស្រី Agnieszka Jusis ក៏បាន​ចូលរួម​ជាមួយ​ក្រុម​បាតុករ​ផង​ដែរ ​ដោយ​អ្នកស្រីលើក​ឡើង​ថា​ ​ខ្ញុំ​ចង់​ជួយ​មនុស្ស ​និងក្មេង​ទាំងនេះ​។ "​ខ្ញុំ​គិត​ថា ​យើង​គួរតែ​ធ្វើ​អ្វី​ម្យ៉ាង​។ ទោះបី​បាន​ត្រឹម​តែ​តវ៉ាក្ដី ប៉ុន្តែ​យើង​គួរតែ​បង្ហាញ​ដល់​រដ្ឋាភិបាល​របស់​យើង ប្រធានាធិបតី​របស់​យើង នាយករដ្ឋមន្ត្រី​របស់​យើង​ថា យើង​នៅ​ទី​នេះ យើង​មិន​យល់ស្រប​នឹង​អ្វី​ដែល​ពួកគេ​កំពុង​ធ្វើ​នោះ​ទេ​។​

​ទន្ទឹម​នឹង​នេះ នគរបាល​ប៉ូឡូញ​បាន​ចេញ​ផ្សាយ​រូបភាព​នៃ​តំបន់​នេះ តាម​បណ្ដោយ​ព្រំដែន​ជាមួយ​ប្រទេស​បេឡា​រុស ដែល​ឥឡូវនេះ​ជំរំ​ជនអន្តោប្រវេសន៍​ត្រូវ​បាន​សម្អាត​ទាំងស្រុង​។​ ​ប្រទេស​បេឡា​រុសបាន​បញ្ជូន​ចេញ​នូវ​ជនអន្តោប្រវេសន៍​ប្រហែល ២,០០០​នាក់​ដែល​កំពុង​រស់​នៅ​ក្នុង​ស្ថានភាព​ត្រជាក់​ខ្លាំងទៅកាន់​ឃ្លាំង​ក្បែរ​នោះ​។​ ​រដ្ឋមន្ត្រី​ការពារ​ជាតិ​ប៉ូឡូញ​លោក Mariusz Błaszczak បាន​ចោទប្រកាន់​ប្រទេស​បេឡា​រុស​ពី "​ការ​ផ្លាស់ប្ដូរ​យុទ្ធសាស្ត្រ​" និង "​ដឹកនាំ​មនុស្ស​ជា​ក្រុម​តូច​ៗ​ទៅកាន់​ចំណុច​ជាច្រើន​ នៅ​តាម​បណ្ដោយ​ព្រំដែន​ភាគ​ខាងកើត​របស់​សហភាព​អឺរ៉ុប​៕

អត្ថបទ៖ សុខមាន