រដ្ឋមន្ត្រីម្នាក់ នៅក្នុងការិយាល័យការបរទេសចក្រភពអង់គ្លេស កាលពីថ្ងៃចន្ទ (ទី២៤ ខែកុម្ភៈ) បានប្រាប់សារព័ត៌មាន Reuters ថា ប្រទេសអង់គ្លេសនឹងដាក់ទណ្ឌកម្ម ក្នុងពេលឆាប់ៗនេះ ចំពោះប្រទេសរ៉្វាន់ដា ពាក់ព័ន្ធនឹងការប្រយុទ្ធគ្នា នៅក្នុងប្រទេសជិតខាងកុងហ្គោ។

នៅពេលត្រូវបានសួរថា តើចក្រភពអង់គ្លេស នឹងដាក់ទណ្ឌកម្មលើប្រទេសរ៉វាន់ដាដែរ ឬទេ លោក Ray Collins ដែលទទួលបន្ទុកគោលនយោបាយអាហ្វ្រិក ក្នុងឋានៈជារដ្ឋមន្ត្រីកម្រិតរដ្ឋ នៅក្នុងការិយាល័យការបរទេស បានឆ្លើយថា «មែនហើយ»។ ហើយនៅពេលសួរពីពេលវេលា លោកបានប្រាប់ថា «ឆាប់ៗនេះ»។

ដោយបាននិយាយទៅកាន់សារព័ត៌មាន Reuters នៅខាងក្រៅកិច្ចប្រជុំក្រុមប្រឹក្សាសិទ្ធិមនុស្សរបស់អង្គការសហប្រជាជាតិ នៅទីក្រុងហ្សឺណែវ ប្រទេសស្វីស លោក Collins បានបន្ថែមថា៖ «ចក្រភពអង់គ្លេស បានបង្ហាញជំហរច្បាស់លាស់ ចំពោះប្រទេសរ៉្វាន់ដា ហើយនឹងចាត់វិធានការក្នុងពេលឆាប់ៗនេះ»។

គួរបញ្ជាក់ថា រ៉្វាន់ដាកំពុងប្រឈមនឹងសម្ពាធសកល ជុំវិញការចោទប្រកាន់ ដែលថា ប្រទេសនេះគាំទ្រក្រុម M23 ដែលចាប់តាំងពីខែមករាមក បានដណ្តើមកាន់កាប់តំបន់ដ៏ធំ នៅភាគខាងកើតប្រទេសកុងហ្គោ ក្នុងនោះរួមទាំងទីក្រុង Goma និង Bukavu ផងដែរ ហើយនិងតំបន់សម្បូរធនធានរ៉ែដ៏មានតម្លៃ៕