ប្រធានាធិបតីសហរដ្ឋអាមេរិកលោក Donald Trump បាននិយាយកាលពីថ្ងៃចន្ទថា ប្រធានាធិបតីរុស្ស៊ីលោក Vladimir Putin បានទទួលយកគំនិតដែលថា អឺរ៉ុបនឹងបញ្ជូនក្រុមថែរក្សាសន្តិភាពទៅកាន់អ៊ុយក្រែន ហើយប្រធានាធិបតីបារាំងលោក Emmanuel Macron និយាយថា អឺរ៉ុបត្រៀមខ្លួនរួចរាល់ក្នុងការជួយជ្រោមជ្រែង ។

លោក Trump និងលោក Macron បានពង្រាងកិច្ចខិតខំ ដើម្បីចរចាបញ្ចប់សង្រ្គាមអ៊ុយក្រែននៅឯសេតវិមាន ក្រោយពួកគេចូលរួមសន្និសីទតាមវីដេអូជាមួយក្រុមមេដឹកនាំប្រទេសមានឧស្សាហកម្មរីកលូតលាស់ G7 ដើម្បីប្រារព្ធខួប ៣ឆ្នាំនៃការចាប់ផ្តើមសង្រ្គាមអ៊ុយក្រែន ។

លោក Trump បាននិយាយពីការទទួលយកកងកម្លាំងថែរក្សាសន្តិភាពរបស់លោក Putinថា បាទ គាត់នឹងព្រមទទួលយក ។ លោកបានសួរគាត់ជាពិសេសលើសំនួរមួយនេះ ហើយគាត់និយាយថា គាត់គ្មានបញ្ហាជាមួយវានោះទេ ។

លោក Macron ដែលជាមេដឹកនាំអឺរ៉ុបលើកដំបូងគេបានជួបលោក Trumpចាប់តាំងពីគាត់ឡើងកាន់អំណាចកាលពីរយៈពេល ១ខែមុន បាននិយាយថា អឺរ៉ុបដើរតួក្នុងការផ្តល់ការធានាសន្តិសុខ ។ លោកថា ដំបូងបទឈប់បាញ់ត្រូវការចរចា ហើយបន្ទាប់មក កិច្ចព្រមព្រៀងសន្តិភាពត្រូវគាំទ្រដោយការធានាសន្តិសុខ ។ 

លោកបន្តថា ពួកយើងបានត្រៀមខ្លួនរួចរាល់ ហើយចង់ផ្តល់ការធានាសន្តិសុខទាំងអស់នេះ ដែលអាចប្រហែលរួមទាំងទាហាន ប៉ុន្តែពួកគេទៅទីនោះ ដើម្បីរក្សាសន្តិភាពប៉ុណ្ណោះ ។

ខណៈពេលនោះដែរ លោក Trump និយាយថា សហរដ្ឋអាមេរិកកាន់តែខិតជិតបំផុតនឹងកិច្ចព្រមព្រៀងរ៉ែ ជាមួយអ៊ុយក្រែន ហើយលោកអាចនឹងជួបជាមួយប្រធានាធិបតីអ៊ុយក្រែនលោក Volodymyr Zelenskiy ពេលក្រោយក្នុងសប្តាហ៍នេះ ឬសប្តាហ៍ក្រោយ ដើម្បីទទួលបានកិច្ចព្រមព្រៀង ។

លោក Trump និយាយពីលោក Zelenskiy ថា គាត់អាចនឹងមកទីនេះ នៅសប្តាហ៍នេះ ឬសប្តាហ៍ក្រោយ ដើម្បីចុះហត្ថលេខាលើកិច្ចព្រមព្រៀង ដែលវាគឺជាការល្អប្រសើរ ។ លោកថា លោកនឹងជួបជាមួយលោក Putinនៅពេលណាមួយផងដែរ ៕