រដ្ឋអាជ្ញាតុលាការព្រហ្មទណ្ឌអន្តរជាតិ(ICC)លោក Karim Khan បានអំពាវនាវឲ្យក្រុមប្រដាប់អាវុធនៅភាគខាងកើតសាធារណរដ្ឋប្រជាធិបតេយ្យកុងហ្គោ គោរពតាមច្បាប់អន្តរជាតិ ស្របពេលដែលការប្រយុទ្ធគ្នា រីករាលដាលកាន់តែខ្លាំងនៅតំបន់សម្បូរធនធានរ៉ែមួយនេះ ។

លោក Khanបានធ្វើដំណើរទៅដល់ទីក្រុង Kinshasa របស់កុងហ្គោកាលពីយប់ថ្ងៃចន្ទ សម្រាប់ដំណើរទស្សនកិច្ចដែលលោកនិយាយថា លោកនឹងជួបជាមួយលោកប្រធានាធិបតី Felix Tshisekedi និងក្រុមមន្រ្តីផ្សេងទៀត ។

នាយករដ្ឋមន្រ្តីកុងហ្គោលោក Judith Suminwa បាននិយាយប្រាប់ក្រុមប្រឹក្សាសិទ្ធិមនុស្សអង្គការសហប្រជាជាតិថា មនុស្សប្រហែល ៧ពាន់នាក់ បានស្លាប់ ចាប់តាំងពីខែមករារហូតមក ពេលដែលកងទ័ព និងក្រុមសម្ព័ន្ធមិត្ត ធ្វើសង្រ្គាមជាមួយក្រុមឧទ្ទាម M23គាំទ្រដោយប្រទេសរ៉្វាន់ដា ។

ការិយាល័យរដ្ឋអាជ្ញា ICC បានស៊ើបអង្កេតលើករណីឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ ដែលត្រូវបានប្រព្រឹត្តចាប់តាំងពីខែកក្កដា ឆ្នាំ ២០០២ នៅតំបន់ Ituri របស់កុងហ្គោ ហើយនិងនៅខេត្ត North Kivu និងខេត្ត South Kivu ចាប់តាំងពីឆ្នាំ ២០០៤ ។

មកទល់នឹងពេលនេះ តុលាការ ICC បានកាត់ទោសក្រុមមេដឹកនាំជីវពល ៣នាក់ សម្រាប់តួនាទីរបស់ពួកគេនៅក្នុងអំពើឃោរឃៅដែលបានប្រព្រឹត្តនៅតំបន់ភាគខាងកើតកុងហ្គោ ដែលជាឧក្រិដ្ឋកម្មសង្រ្គាម និងជាឧក្រិដ្ឋកម្មប្រឆាំងមនុស្សជាតិ ៕