វិមានក្រឹមឡាំង នៅថ្ងៃអង្គារ (ទី២៥ ខែកុម្ភៈ) នេះ បានស្វាគមន៍ ចំពោះអ្វីដែលខ្លួនបានពិពណ៌នាថា ជាជំហររបស់សហរដ្ឋអាមេរិកដែលមិនមានភាពលម្អៀងជាងមុន ជុំវិញបញ្ហាអ៊ុយក្រែន បន្ទាប់ពីក្រុមប្រឹក្សាសន្តិសុខអង្គការសហប្រជាជាតិ (UNSC) កាលពីថ្ងៃចន្ទ (ទី២៤ ខែកុម្ភៈ) បានអនុម័តសេចក្តីព្រាងសេចក្ដីសម្រេចរបស់សហរដ្ឋអាមេរិកដែលបានប្រកាន់ជំហរអព្យាក្រឹតលើជម្លោះនេះ។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «យើងឃើញថា សហរដ្ឋអាមេរិក កំពុងប្រកាន់យកជំហរដែលមិនមានភាពលម្អៀងជាងមុន ដែលពិតជាជួយដល់កិច្ចប្រឹងប្រែង ក្នុងគោលបំណងដោះស្រាយជម្លោះ នៅអ៊ុយក្រែន។ យើងពិតជាស្វាគមន៍ ចំពោះការធ្វើបែបនេះ។ យើងជឿថា ជំហរដែលមិនមានភាពលម្អៀងបែបនេះ សរបញ្ជាក់ឲ្យឃើញពីការមានបំណងប្រាថ្នាយ៉ាងពិតប្រាកដ ក្នុងការរួមចំណែកដល់ការស្វែងរកដំណោះស្រាយ»។

គួរបញ្ជាក់ថា នៅឯមហាសន្និបាតអង្គការសហប្រជាជាតិ កាលពីថ្ងៃចន្ទ សហរដ្ឋអាមេរិកបានជំទាស់ដោយមិនជោគជ័យ ចំពោះសេចក្ដីសម្រេចដែលទាមទារឲ្យរុស្ស៊ីដកចេញពីអ៊ុយក្រែន។ ប៉ុន្តែនៅឯ UNSC ខ្លួនបានទទួលការអនុម័ត លើសេចក្ដីសម្រេច ដែលអំពាវនាវឲ្យមានសន្តិភាព ដោយមិនមានការបន្ទោសដល់ភាគីណាមួយ ក្នុងសង្គ្រាមនេះ។

ការបោះឆ្នោត នៅថ្ងៃខួប ៣ឆ្នាំនៃសង្រ្គាមនេះ បានបង្ហាញពីការផ្លាស់ប្តូរយ៉ាងខ្លាំងក្លា នៅក្នុងគោលជំហររបស់ទីក្រុងវ៉ាស៊ីនតោន ចាប់តាំងពីប្រធានាធិបតី លោក Donald Trump ចូលកាន់តំណែង ក្នុងខែមករា៕